Կրակոցներ` Վանաձորում. 3 վիրավորներից մեկը «Փամբակեցի եղբայրներ» ՍՊԸ–ի տնօրենն է (ՖՈՏՈ, ՏԵՍԱՆՅՈՒԹ)

Երեկ` դեկտեմբերի 12-ին, կրակոցներ են հնչել Վանաձորում:

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 23.55-ին Վանաձորի թիվ 1 հիվանդանոցից ոստիկանության Վանաձորի բաժին հաղորդում է ստացվել, որ ոտքերի մասերում ստացած հրազենային վերքերով իրենց մոտ բուժօգնության են տեղափոխվել Վանաձոր քաղաքի Սունդուկյան փողոցի բնակիչ, 36-ամյա Արսեն Գևորգյանը, Լոռու մարզի Վահագնաձոր գյուղի բնակիչ 46-ամյա Մարտիրոս Ավետիքյանը և Վանաձորի Կարբիշև փողոցի բնակիչ 43-ամյա Գարիկ Մուրադյանը։

Հիվանդանոց են մեկնել ոստիկանության Լոռու մարզային վարչության օպերատիվ խումբը' վարչության պետ Անուբախ Համբարյանի գլխավորությամբ: Ժամանել են նաև ոստիկանության քննչական գլխավոր վարչության Լոռու մարզի քննչական բաժնի մի քանի քննիչներ քննչական բաժնի պետ Գագիկ Իսպիրյանի գլխավորությամբ:

Օպերատիվ քննչական խումբը պարզել է, որ նույն օրը' ժամը 23.50-ի սահմաններում, անհայտ անձը Դեմիրճյան փողոցի թիվ 1/Բ շենքի մոտ, հրազենից կրակ է արձակել նշված վայրում կայանված' Գ.Մուրադյանի «Միցուբիշի Պաջերո» մակնիշի 78 ԼՕ 008 համարանիշի ավտոմեքենայի վրա: Այդ պահին Միտսուբիշի Պաջերոյի մոտ են կանգնած եղել Ա.Գևորգյանը, Մ.Ավետիքյանը և Գ. Մուրադյանը: Նրանք չեն հասրել նստել ավտոմեքենան, երբ հնչել են կրակոցները: Ըստ նախնական տեղեկությունների կրակոցները ուղղված են եղել նրանց ուղղությամբ և դրա արդյունքում նրանք հրազենային վնասվածքներ են ստացել:

Վանաձորցիները ֆոտոլրագրող Գագիկ Շամշյանին պատմել են, որ Արսեն Գևորգյանը «Փամբակեցի եղբայրներ» ՍՊԸ-ի տնօրենն է:

Արդեն այսօր դեկտեմբերի 13-ին' ժամը 02.40-ին Լոռու մարզի ոստիկանները Միտսուբիշի Պաջերոն, որի վրա եղել են բազմաթիվ կրակոցի հետքեր, հայտնաբերվել է Գ. Մուրադյանի տան բակում: Այն քննիչի հանձանարականով տեղափոխվել է ոստիկանության Վանաձորի բաժնի տուգանային հրապարակ:

Փաստի առթիվ ոստիկանության քննչական գլխավոր վարչության Լոռու մարզի քննչական բաժնում հարուցվել է քրեական գործ ՀՀ Քր. Օր.-ի 34 (հանցափորձ) 104 հոդվածի 2-րդ մասի առաջին կետի (սպանություն երկու կամ ավելի անձանց) հատկանիշներով:

Դեպքի վայրում հայտնաբերվել և առգրավվել է ԱԿՄ տեսակի ինքնաձիգից արձակված 5.45 մմ տրամաչափի 12 կրակված պարկուճ: Նշանակվել են մի շարք փորձաքննություններ:

Այս պահին Վանաձոր են ժամանել ոստիկանության քրեական հետախուզության և կազմակերպված հանցավորության դեմ պայքարի (6-րդ) գլխավոր վարչությունների և ոստիկանության փորձաքրեագիտական կենտրոնի մեծ թվով աշխատակիցներ, ովքեր ուժեղացված ծառայություն են իրականացնում Վանաձորում: Ստուգում են կասկածելի ավտոմեքենաները: Քիչ առաջ Վանաձորի ոստիկանության բաժին ժամանեց նաև Լոռու մարզի դատախազ Կարեն Շահբազյանը։

Լուսանկարները և տեսանյութը՝ Գագիկ Շամշյանի