Սա ՀՀ գլխավոր դհոլչու ձեռագրի շարունակությունն է. Նարեկ Մանթաշյանի փաստաբան

«Այլընտրանք» ՀԿ-ի ղեկավար, «Հայաստան» դաշինքի անդամ Նարեկ Մանթաշյանի խափանման միջոցը հարցը քննող պրոֆեսիոնալ իրավաբանի հետ գործ ունեինք, բայց այդ իրավաբանը չունեցավ անհրաժեշտ կամք, որպեսզի մերժեր այդ անբարոյական միջնորդությունը։ Այս մասին այսօր՝ դեկտեմբերի 15-ին, դատարանի բակում՝ լրագրողների հետ զրույցում ասաց Մանթաշյանի փաստաբան Ալեքսանդր Կոչուբաևը։

Նշենք, որ քիչ առաջ դատարանը, բավարարելով ԱԱԾ քննիչի միջնորդությունը, 2 ամսով կալանավորեց Նարեկ Մանթաշյանին։

«Սրանք ճիշտ այն նույն մեղադրանքներն էին, որոնցով Մանթաշյանը մեկ տարի առաջ էր մեղսագրվել։ Մեկ այլ դատարան արձանագրել էր, որ Նարեկ Մանթաշյանին մեղսագրված արարքում բացակայում է հիմնավոր կասկածը։ Ես սա կապում եմ ՀՀ գլխավոր դհոլչու ձեռագրի շարունակություն։ Այսինքն՝ եթե գլխավոր դհոլչու մակարդակով կարելի է ՍԴ որոշումներ քննարկել, քննադատել, կասկածի տակ դնել դրա իրավաչափությունը, ապա ինչու կաշկանդվեն իրավապահ, դատաիրավական համակարգի մյուս անդամները, և ինչու օրինակ՝ արհամարհել արդեն իսկ օրինական ուժ ստացած դատական ակտը և արձանագրել, որ հիմնավոր կասկած էլ կա, կալանավորում էլ կա»,- նշեց նա։

Ըստ փաստաբանի՝ այս մեղադրանքը քաղաքական հետապնդում է Մանթաշյանի նկատմամբ։

«Բայց պետք է պետպատվեր իջեցնողներին երազախափ անեմ, դրանով ամենևին ոչ Մանթաշյանը, ոչ նրա ընկերները, ոչ նրա ընտանիքը չեն կոտրվել, ընդամենը հասկանում են, որ պայքար է, որը ենթադրում է նաև կալանավորումներ, ռեպրեսիաներ»,- ասաց փաստաբանը։

Նշենք, որ Մանթաշյանին մեղադրանք է առաջադրվել նախորդ տարվա նոյեմբերի 9-ի լույս 10-ի գիշերը Կառավարության շենքում առանձնապես խոշոր չափերի կողոպուտ կատարելու հատկանիշներով։

Մանթաշյանն իրեն առաջադրված մեղադրանքը չի ընդունում եւ այն որակում է որպես քաղաքական հետապնդում իր նկատմամբ։