Ռուսաստանում մի խումբ հայեր են դատապարտվել ազատազրկման

Մերձմոսկովյան դատարանը 5-ից 20 տարվա ազատազրկման է դատապարտել ՌԴ հատուկ նշանակության ջոկատի նախկին մարտիկ Նիկիտա Բելյանկինի սպանության գործով մեղադրյալներին։ Այս մասին Telegram ալիքում հայտնել է Մոսկվայի մարզի դատախազության մամուլի ծառայությունը։

Ընտրված առավելագույն ժամկետը՝ 20 տարի ազատազրկում, տրվել է Սերգեյ Խոջոյանին, որը դանակով մահացու հարված է հասցրել Բելյանկինին։

Եղբայրներ Համլետ և Հրանտ Հայրապետյանները, որոնք, համաձայն դատարանի, սպանության պահին պահել են Բելյանկինին, ինչպես նաև «ակտիվորեն մասնակցել» են երկու ռեանիմատոլոգների ծեծի ենթարկելուն, դատապարտվել են խիստ ռեժիմի գաղութում համապատասխանաբար 17 և 18 տարվա ազատազրկման:

Նվազագույն պատիժը՝ 5 տարի ընդհանուր ռեժիմի գաղութում, ստացել է Նարեկ Ստեփանյանը, իսկ Արթուր Հակոբյանը, Դավիթ Եղիազարյանը, Սուրեն Մարկոսյանը, Ռուդիկ Մանուկյանը, Սահակ Սահակյանը դատապարտվել են 5,5-ական տարվա ազատազրկման։

«Դատարանը պարզել է, որ 2019 թվականի հունիսի 1-ի լույս 2-ի գիշերը Կրասնոգորսկում այդ անձինք կատարել են խուլիգանություն, որի ժամանակ ծեծի են ենթարկել Վլադիմիր Դանիլովին և Ալեքսանդր Սերգեևին։ Ընթացքում սպանելու նպատակով Համլետ և Հրանտ Հայրապետյանները բռնել են Սերգեևին, իսկ Խոջայանը դանակով հարվածել է նրա որովայնին՝ դանակի թափանցող վնասվածք պատճառելով։ Տուժածը չի մահացել, քանի որ նրանց գործողությունները դադարեցրել է կողքով անցնող Նիկիտա Բելյանկինը»,- պարզաբանել են վարչությունից։

Այն բանից հետո, երբ Բելյանկինը պահանջել է դադարեցնել հարձակումը, Համլետ Հայրապետյանը, Հրանտ Հայրապետյանը և Խոջայանը ծեծի են ենթարկել նրան։

Քննությամբ ապացուցվել է, որ Խոջայանը դանակահարել է ռուս տղամարդուն։ Արդյունքում` գործի մասնակիցները դատապարտվել են ազատազրկման և իրենց պատիժը կկրեն ընդհանուր ու խիստ ռեժիմների գաղութներում։

Նշվում է, որ հատուկ նշանակության ջոկատի նախկին անդամ, Սիրիայում մարտերի մասնակից Նիկիտա Բելյանկինն իր ընկերուհու հետ քայլելիս է եղել փողոցով, երբ բարի մոտ նկատել է, թե ինչպես են ծեծում երկու հոգու։ Հետաքննության պաշտոնական վարկածի համաձայն՝ Բելյանկինը հանել է տրավմատիկ ատրճանակը և մի քանի նախազգուշական կրակոց արձակել օդ։ Կռվի ժամանակ զոհված Բելյանկինը 24 տարեկան էր։