Ո՞ւր է զինվորը, քանի՞ սպա է պատասխանատվություն կրել նրա առեղծվածային անհետացման դեպքով․ փաստաբան

ՀՀ պաշտպանության նախարարության զինված ուժերում ծառայող Նորիկ Մկրտչյանը 2021 թվականի մայիսի 14-ից մինչ օրս համարվում է անհետ կորած։ Պարզվում է նախաքննական մարմինը քրեական  գործ է հարուցել վերջինիս դեմ:  Այս մասին ԼՈՒՐԵՐ.com-ի հետ զրույցում ասաց Նորիկ Մկիրտչյանի փաստաբան Լուսինե Վիրաբյանը՝ նշելով, որ իր պաշտպանյալին մեղադրանք է առաջադրվել դասալքության համար:

«ՊՆ ներկայացուցիչները վարկած են առաջ քաշում, թե Նորիկն ինքնակամ է լքել զորամասը։ Բայց շուրջ 8 ամիս է ծնողը չունի որևէ տեղեկություն, թե որտեղ է գտնվում որդին և որևէ մեկից աջակցություն չի ստանում: Փաստն այն է, որ նրանից լուր չկա ու որևէ մեկը պատասխան չի տալիս դրա համար․ չկա գերիների, մահացածների, անհետ կորածների ցուցակում, մարտերի չի մասնակցել։ 18 տարեկան զինծառայողը չի կարող 8 ամիս շարունակ առանց գումարի թաքնվել, եթե դա կոչում են փախուստ: Մինչև հիմա պարզ չէ, թե ինչ հանգամանքներում է նա անհետացել։ Այնքան էլ հակված չենք վարկածին, թե նա կարող էր թաքնվել, քանի որ անհնար է 8 ամիս շարունակ կապ չհաստատեր ընտանիքի անդամների հետ։ Զինծառայողը եղել է նորմալ, հանգիստ պայմաններում, պատերազմական իրադրություն չի եղել: Հրամանատարությունը «նույնպես» տեղեկություն չունի, հավանաբար, կանոնակարգված հսկողություն չի իրականացրել։ Հայտնի չէ, թե ինչ է կատարվել իրականում։ Ծնողը համաձայն է՝ եթե երեխան հակաօրինական արարք է արել թող պատասխանատվության ենթարկեն, միայն թե բերեն տղային»,- նշեց նա:

Փաստաբանի խոսքով՝ պատկան մարմինները 8 ամիս շարունակ ոչնչով չեն զբաղվել, ուստի պատրաստվում է հանցագործության մասին հաղորդում  ներկայացնել, քանի որ զինծառայողը պատերազմական իրադրության պայմաններում չի անհետացել․ «ՊՆ, Քննչական կոմիտեն շուրջ 8 ամիս ինչո՞վ է զբաղված: Ո՞ւր է զինվորը: Մինչ այս պահը քանի՞ սպա է պատասխանատվություն կրել զինվորի առեղծվածային անհետացման դեպքով: Վաղը կներկայացնեմ ուշացած հաղորդում` հանցագործության մասին»,- ասաց Վիրաբյանը:

Ավելի վաղ՝ մեզ հետ զրույցում անհետ կորած զինծառայող Նորիկի մայրը՝ Լիլիթ Աղաբաբյանը, հայտնել էր, որ որդուն 8-12 տարվա ազատազրկում է սպառնում։

Նշենք, որ 2021 թվականի փետրվարին Նորիկը զորակոչվել է ծառայության։ Վերջին անգամ մոր հետ հեռախոսազրույց է ունեցել մայիսի 14-ին, իսկ մայիսի 18-ին ծնողին հայտնել են, որ Նորիկն անհետացել է: Արդեն հուլիսին հարուցվել է քրեական գործ և Ռազմական ոստիկանության կողմից հայտարարվել է հետախուզում:

Սոնա Հարությունյան