Հայտնի է՝ ում մոխրացած դին է հայտնաբերվել հրդեհված մեքենայի կողքին

Շենգավիթ վարչական շրջանի Արտաշիսյան փողոցի գազատարին բախված «Opel» մակնիշի ավտոմեքենայի վարորդ 76-ամյա Աղաբեկ Հարությունյանը տեղափոխվել է Այրվածքաբանական կենտրոն, իսկ մահացածը, որին դին մոխրացել էր, հետևի նստատեղին նստած ուղևորն էր։ Այս մասին ԼՈՒՐԵՐ.com-ի հետ զրույցում ասաց Քննչական կոմիտեի մամուլի խոսնակ Վարդան Թադևոսյանը։

«Հովսեփյան-Արտաշիսյան փողոցների խաչմերուկում, «Opel» մակնիշի ավտոմեքենան, որի վարորդը եղել է Երևանի բնակիչ 76-ամյա Աղաբեկ Հարությունյանը, բախվել է ՎԱԶ 2101 ավտոմեքենային։ Բախումից հետո «Opel»-ը հարվածել է գազատար խողովակին, և հրդեհ է բռնկվել։ «Opel»-ի վարորդը տեղափոխվել է Այրվածքաբանական կենտրոն, իսկ հետևի նստատեղին նստած ուղևորը, որն, ամենայն հավանականությամբ, կին է եղել, մահացել է»,- նշեց Թադևոսյանը։

Վարդան Թադևոսյանն ասաց, որ դեպքի առնչությամբ քրեական գործ է հարուցվել։

«76-ամյա վարորդը վարորդական իրավունք չի ունեցել։ Հարուցվել է քրեական գործ Քրեական օրենսգրքի 243 հոդվածի առաջին մասով»,- ասաց նա։

Հիշեցնենք, որ երեկ՝ հունվարի 13-ին «Opel Zafira» մակնիշի ավտոմեքենան բախվել էր Արտաշիսյան փողոցի թիվ 44/4 շենքին հարակից գազատար խողովակին, ինչի հետևանքով տեղի է ունեցել գազի արտահոսք՝ հրդեհի բռնկմամբ։

Կարող եք ընթերցել նաև՝ «Հրդեհված ավտոմեքենայի վարորդը վերակենդանացման բաժանմունքում է. մանրամասներ»: