Եթե Բորիս Բախշիյանին արդարության հիմունքներով են կալանավորել, Արմեն Դանիելյանն ինչու կալանավորված չի. Արթուր Սարգսյան

Դատավոր Բորիս Բախշիյանին չեմ ճանաչել, ընդամենը մի 2 անգամ մասնակցել եմ Մանվել Փարամազյանի դատական նիստին եւ ասեմ, որ 4-5 ամիս, որ գործը գտնվել է դատավոր Բախշիյանի մոտ, նա մերժել է պարոն Փարամազյանին գտնվելու ազատության մեջ: Այս մասին, այսօր՝ փետրվարի 9-ին, Վերաքննիչ քրեական դատարանի մոտ լրագրողների հետ զրույցում նշեց ԱԺ «Հայաստան» խմբակցության պատգամավոր Արթուր Սարգսյանը:

«Բորիս Բախշիյանին, որ կալանավորել են, հիմքում դրված է այն, որ ծանուցել է մեղադրյալին, բայց նրան թույլ չի տվել, որ իր ազատ խոսքն ասի դատարանում: Այս դեպքում գոնե մեղադրյալին ծանուցել էին, իմ դեպքում ինձ ոչ ծանուցել են, ոչ դատական նիստին ներկա եմ եղել, ոչ էլ իմ ազատ խոսքը կարողացել եմ ասել եւ ինձ կալանավորել են: Հիմա դատավոր Արմեն Դանիելյանն ինչու կալանավորված չի:

Հիմա իշխանությունները, ԱԺ պատգամավորներն ասում են՝ մեր երկրում արդարություն կա: Եթե արդարություն կա, Բորիս Բախշիյանին արդարության հիմունքներով են կալանավորել, Արմեն Դանիելյանն ինչու այսօր չի կալանավորված:

Փաստ է, որ Բորիս Բախշիյանին կալանավորել են, որովհետեւ Մանվել Փարամազյանի դեմ ցուցմունք տված վկան իրենց վկան էր, դրա համար կալանավորել են, իսկ այստեղ ես եմ, իրենցը չեմ, դրա համար Արմեն Դանիելյանին չեն կալանավորում»,-ընդգծեց նա՝ հավելելով, որ իր պաշտպաններն այդ հարցով դիմել են, սակայն մինչ օրս պատասխան չկա: