Ավտոբուսի գրպանահատը կողոպուտից հետո փախչելիս, կասկածանքով բերման է ենթարկվել բաժին

Հալաբյան փողոցի 39-ամյա բնակիչը 258 երթուղու ավտոբուսում մի ուղևորուհու գրպանից բացահայտ հափշտակել էր բջջային հեռախոսը, բայց փախչելիս ոստիկաններին հաջողվել էր բռնել նրան և բերման ենթարկել բաժին։ Այլ մանրամասներ հաղորդում է ՀՀ ոստիկանությունը։

«Փետրվարի 7-ին ոստիկանության Արաբկիրի բաժնի սպասարկման տարածքում կողոպուտ էր եղել: Երեկոյան թիվ 258 երթուղու ավտոբուսում մի տղամարդ ուղևորուհիներից մեկի գրպանից բացահայտ հափշտակել էր բջջային հեռախոսը, իջել Ազատության պողոտայի կանգառներից մեկում ու փախել: Արաբկիրի բաժնի համայնքային ոստիկանները կանգառում տեսնելով կողոպուտ կատարած անձին փախչելիս՝ հետապնդել էին, բռնել ու կասկածանքով բերման ենթարկել բաժին:

Կասկածվողը, որ Երևան քաղաքի Հալաբյան փողոցի 39-ամյա բնակիչ է, փախչելիս Ազատության պողոտայում նետել էր հեռախոսը: Բերման ենթարկված տղամարդը խոստովանել է կատարածը: Տարածքի զննությամբ բջջային հեռախոսը հայտնաբերվել է: Փաստի առթիվ նյութեր են նախապատրաստվում»,-ասված է հաղորդագրության մեջ: