Մի շարք օրենսդրական ակտեր են մշակվել Գերմանիայի փորձագետների աջակցությամբ. Թաթոյանը՝ դեսպանին

ՄԻՊ-ից հայտնում են, որ Արման Թաթոյան կարևորել է այն, որ ՀՀ մի շարք հիմնարար օրենսդրական ակտեր մշակվել կամ ընդունվել են Գերմանիայի փորձագետների աջակցությամբ, օրինակ՝ Քրեական դատավարության, Քրեական, Քրեակատարողական օրենսգրքերը և այլն։

Բացի այդ, շեշտվել է, որ բարձր համագործակցություն է հաստատված եղել Գերմանիայի միջազգային համագործակցության ընկերության (GIZ) և Միջազգային իրավական համագործակցության գերմանական հիմնադրամի (IRZ) հետ։

Պաշտպանի հաստատությանը կարևոր աջակցություն է ցուցաբերել Կոնրադ Ադենաուեր հիմնադրամը։

Արման Թաթոյանը ներկայացրել է իր գործունեության 6 տարիների ընթացքում իրականացրած ծրագրերը, որոնք կապված են եղել երեխաների, կանանց ու հաշմանդամություն ունեցող անձանց իրավունքների, կարծրատիպերի դեմ պայքարի, փախստականների ու ապաստան հայցողների իրավունքների, խոսքի ազատության ու լրագրողների մասնագիտական աշխատանքի հետ և այլն։

Հանդիպման ընթացքում քննարկվել են մարդու իրավունքների պաշտպանությանն առնչվող հարցեր նաև այնպիսի ոլորտներում, ինչպիսիք են ազատությունից զրկման վայրերը (ՔԿՀ-ներ, հոգեբուժարաններ և այլն), դատական համակարգում արձանագրված խնդիրները՝ կապված դատական նիստերի անհիմն ձգձգումների, ողջամիտ ժամկետների խախտումների հետ և այլն:

Պաշտպանը շնորհակալություն է հայտնել նաև Հայաստանում Գերմանիայի Դաշնային Հանրապետության դեսպանին արդյունավետ համագործակցության համար, որի շրջանակներում կազմակերպվել է նաև լրագրողների այց Բեռլին՝ Գերմանիայում կանանց իրավունքների պաշտպանության, ինչպես նաև ընտանիքում բռնության կանխարգելման հարցերին ու օրենսդրությանը ծանոթանալու նպատակով։