Արեշում զինված «ռազբորկա» է կանխվել. 8 անձ բերման է ենթարկվել, հայտնաբերվել է ատրճանակ և թմրամիջոց

Մարտի 3-ին ՀՀ ոստիկանության քրեական ոստիկանության գլխավոր վարչության ծառայողները մայրաքաղաքում իրականացրել են հատուկ օպերացիա, ինչի շնորհիվ հնարավոր է եղել կանխել առանձնապես ծանր հանցագործություն, գրում է shamshyan.com-ը։

Քրեական ոստիկանությունում օպերատիվ տեղեկություններ էին ստացվել, որ Երևան քաղաքի Էրեբունի փողոցի 8/1 հասցեում մի խումբ երիտասարդներ հավաքվել են և իրենց միջև «ռազբորկա են անում» ու հնարավոր է, որ նրանք զինված են։ 

Ոստիկանները նշված հասցեում գտնվող ավտովերանորոգման կետի շինությունից ապօրինի զենք-զինամթերք և թմրամիջոց պահելու կասկածանքով ոստիկանության Էրեբունու բաժին են բերման ենթարկել 8 անձի։ 

Ըստ աղբյուրի՝ նրանցից մեկը, տեսնելով ոստիկաններին, գոտկատեղից ատրճանակը հանել և շպրտել է սենյակի տեսանելի հատվածում։

Բերման ենթարկվածներն են Երևանի բնակիչները՝ 27-ամյա Իշխան Թովմասյանը, 33-ամյա Դավիթ Սահակյանը, 25-ամյա Պետրոս Մինասյանը, 30-ամյա Արթուր Աֆրիկյանը, Կոտայքի մարզի բնակիչ՝ 30-ամյա Ռուբեն Հակոբյանը, Ջրվեժ գյուղի բնակիչ՝ 34-ամյա Վարդգես Բերակչյանը։ Պարզվել է, որ ատրճանակը նետած անձը Կոտայքի մարզի բնակիչ՝ 35-ամյա Արտակ Խաչատրյանն է։  Անձնական խուզարկությամբ Ի. Թովմասյանի մոտ հայտնաբերվել է 1 հատ մոխրացած հետքերով կաթուցիչ, 1 հատ մոխրացած հետքերով ապակյա կոլբա, 1 հատ ծալովի դանակ։ Իսկ Ա. Աֆրիկյանի մոտ հայտնաբերվել է 1 հատ մոխրացած հետքերով կաթուցիչ, 1 հատ մոխրացած հետքերով ապակյա կոլբա։ 

Վերջիններս հայտարարել են, որ հայտնաբերվածները պատկանում են իրենց։ 

Փաստի առթիվ ոստիկանության Էրեբունու բաժնի հետաքննական բաժանմունքում նյութեր են նախապատրաստվում։ Բերման ենթարկվածները բաց են թողնվել, հետաքննիչի որոշմամբ նշանակվել է դատաձգաբանական, դատանյութագիտական փորձաքննություններ։