Ալումյանը միջնորդել է փոխել Քոչարյանի խափանման միջոցը․ դատավարությունը կշարունակվի փակ նիստում

«Սիլվայի գործով» դատը շարունակում է քննել ՀՀ երկրորդ նախագահ Ռոբերտ Քոչարյանի խափանման միջոցը փոխելու փաստաբան Հայկ Ալումյանի վերջին նիստում ներկայացրած միջնորդությունը։

Հայկ Ալումյանն ասաց, որ գլխավոր դատախազին ուղղված դիմումի պատասխանը դեռ չի ստացվել։ Պաշտպանական կողմը դիմել է գլխավոր դատախազին՝ պաշտպանյալի նկատմամբ խափանման միջոցն ընտրելու հիմնավորումների եւ այլ հարցի հիմնավորումների մասին հարցով։ Թե հատկապես ինչի մասին է խոսքը ԶԼՄ-ների համար անհասկանալի է մնում, քանի որ այս մասը քննարկվել է դռնփակ հանդիպման ժամանակ։ Ըստ Ալումյանի՝ պատասխան չկա նաեւ հակակոռուպցիոն հանձնաժողովին ուղղված դիմումին։ Փաստաբանն առաջարկեց, որ տվյալները դատախազները տրամադրեն, ինչին դատավոր Դանիբեկյանը նշեց, որ մեղադրող կողմին չի կարող պարտավորեցնել դա անել։ «Համենայնդեպս, մենք դա չենք կարող թողնել դատախազությանը, քանի որ հայտնի է նրա վերաբերմունքը գործին»,- ասաց փաստաբանը՝ հայտնելով, որ դիմել է նաեւ քննիչ Մուշեղյանին։ Սակայն նրա պատասխանը փաստաբանը խնդրել է, որ փակ դռների հետեւում հրապարակվի, քանի որ տվյալները վերաբերում են գործընթացին չմասնակցող անձի։ Նիստը շարունակվել է փակ դռների հետեւում։