Բերման ենթարկված բոլոր քաղաքացիների նկատմամբ քրեական հետապնդում է սկսվել. Կոչուբաեւ

Ոստիկանության ներկայացուցիչների կողմից այսօր՝ մայիսի 30-ին, տարբեր բաժանմունքներ բերման ենթարկված բոլոր քաղաքացիների նկատմամբ քրեական հետապնդում է սկսվել։ Այս մասին լրագրողների հետ զրույցում հայտնեց փաստաբան Ալեքսանդր Կոչուբաեւը։

«Իշխանությունն ու Ոստիկանությունը գնում են մեծագույն դավադրության եւ խաղաղ ակցիա իրականացնող հավաքի մասնակիցների նկատմամբ քրեական հետապնդում է սկսվել։ Ոչ միայն Էրեբունու բաժնի, այլ նաեւ ընդհանուր բաժիններում բերման ենթարկվածների նկատմամբ է սկսվել քրեական հետապնդում։ Քրեական հետապնդում է նախաձեռնվել իբրեւ խուլիգանության հանցափաստով։ Տարակուսելին այն է, որ մեկ ոստիկան նկատել է օրինակ՝ 20-ից 30 հոգանոց խումբն ինչպես է խուլիգանություն կատարում, սա էլ այն դեպքում, երբ մի քաղաքացի բերման է ենթարկվել Նժդեհի արձանի դիմացից, մյուսը՝ Կառավարության շենքից»,- ասաց նա։

Փաստաբանը հայտնեց, որ երկու անչափահասի նկատմամբ խուլիգանության հանցափաստով նույնպես քրեական հետապնդում սկսվել։

Նա նշեց, որ արձանագրվել են բռնություն կիրառելու հատկանիշներ։

Հիշեցնենք, որ այսօր «Դիմադրություն» շարժումը անհնազանդության ակցիա էր իրականացնում Կառավարության երրորդ մասնաշենքի մոտ։ Ընդդիմադիր պատգամավորները ցանկանում էին մուտք գործել մասնաշենք՝ հանդիպելու նախարարների հետ եւ նրանց դիրքորոշումները լսել Արցախի ճակատագրի, ինչպես նաեւ իրենց կողմից ներկայացված կետերի առնչությամբ։ Կառավարության մասնաշենքի մուտքը մի քանի շարքով պատ էին կազմել ոստիկանները, որոնք խոչընդոտեցին պատգամավորների մուտքը։ Արդյունքում իրավիճակը լարվեց, քաշքշուկ տեղի ունեցավ, բռնի ուժով բերման ենթարկվեցին մի շարք քաղաքացիներ։