‹‹Քաղաքական իշխանությունը ակտիվորեն լծվել է դատաիրավական համակարգը հողին հավասարեցնելու գործին››

‹‹Պարզ է, որ Աննա Վարդապետյանը Նիկոլ Փաշինյանի գլխավոր դատախազի թեկնածուն էր, այդ պատճառով իրենք իրենցով՝ տնավարի բերեցին, համապատասխան  հարցերը տվեցին և ընտրեցին որպես գլխավոր դատախազ››,-Աննա Վարդապետյանի՝ երեկ ՀՀ գլխավոր դատախազի պաշտոնում  ընտրվելու մասին ԼՈՒՐԵՐ.com-ի հետ զրույցում կարծիք հայտնեց իրավաբան Ռոբերտ Հայրապետյանը:

Աննա Վարդապետյանի ընտրությունը կատարվեց միայն  իշխանական պատգամավորների ձայներով՝ առանց ընդդիմության մասնակցության: Նա  սեպտեմբերից կստանձի  գլխավոր դատախազի պաշտոնը:

Անդրադառնալով այն հարցին, թե արդյոք Աննա Վարդապետյանը կարող է իր աշխատանքում պահպանել  օբյեկտիվության սկզբունքը՝ հաշվի առնելով այն փաստը, որ զբաղեցրել է  ՀՀ վարչապետ Նիկոլ Փաշինյանի օգնականի, ինչպես նաև ՀՀ արդարադատության նախարարի տեղակալի պաշտոնները, Ռոբերտ Հայրապետյանը նշեց, որ  ակներև է, որ  նա  չի կարողանալու ցուցաբերել օբյեկտիվություն.

‹‹Աննա Վարդապետյանը՝ որպես վստահելի և դատաիրավական համակարգի իրավապահ մարմիններին ցուցում տված անձ, Նիկոլ Փաշինյանի կողմից ուղղորդվում է որպես գլխավոր դատախազ, որպեսզի ամեն ինչ ‹‹կարճ և ուղիղ›› ընթացքով գնա››:  

Այն, որ ԱԺ-ում գլխավոր դատախազի ընտրությանը ներկա չէր ընդդիմությունը, Հայրապետյանը ճիշտ գնահատեց:

‹‹Եթե ընդդիմությունը լիներ խորհրդարանում, ապա, միևնույնն է, չէր մասնակցելու  քվեարկությանը, չէր ազդելու արդյունքի վրա, լավագույն դեպքում՝ հնչեցնելու էր հարցեր, որոնք «տուպիկի մեջ» էին  դնելու Աննա Վարդապետյանին և լեգիտիմացնելու էր Աննա Վարդապետյանի ընտրությունները:  Կարծում եմ՝ ընդդիմության այնտեղ չգտնվելն ու քվեարկությանը չմասնակցելը շատ ավելի ճիշտ մոտեցում էր, քան այդ խեղկատակությանը մասնակցելը››,-իր խոսքում ընդգծեց նա:

Դատաիրավան համակարգի ապագայի մասին խոսելիս նա նշեց, որ  հաշվի առնելով վճռաբեկ դատարանի դատավորների վերջին ընտրությունները, ՀՀ գլխավոր դատախազի ընտրությունը, Սեդա Սաֆարյանին ՀՀ սահմանադրական  դատարան գործուղելը՝ Հայաստանի դատաիրավական համակարգի ճակատագիրը շատ կարճ ժամանակում նման է լինելու բակերում գտնվող տաղավարներում  կենցաղային մակարդակի զրույցների արդյունքում ինչ-որ որոշումներ կայացնելուն:

‹‹Շատ խորը ցավով արձանագրում եմ, որ մնացած ոլորտները ապականելուց հետո քաղաքական իշխանությունը ակտիվորեն լծվել է դատաիրավական համակարգը  հողին հավասարեցնելու գործին››,-իր խոսքը այսպես եզրափակեց Ռ. Հայրապետյանը: 

Այս թեմայով «Ժողովուրդ». Գլխավոր դատախազն առաջիկայում կմիջնորդի կալանավորել երեք պատգամավորի «Հրապարակ». Պասերով դատավոր են «դատում» «Փաստ». «Նոր» խնդիրներ՝ նոր դատախազի առջև ՔՊ-ական պաշտոնյաների «մենամարտերը». Աննա Վարդապետյան, Ռուստամ Բադասյան «Ժողովուրդ». Ինչ ճակատագիր ունեցավ Փաշինյանի խորհրդականի հոր գործը