‹‹Դատաիրավական համակարգում 45 տարեկանից բարձր յուրաքանչյուր ոք իր վրա կրում է անցյալի բեռը››. Հովիկ Աղազարյան

Սահմանադրության օրվա առթիվ ՀՀ վարչապետ Նիկոլ Փաշինյանն իր շնորհավորական ուղերձում նշեց, որ իշխանությունը ժողովրդին պատկանելու  նպատակն իրագործվել է: ԼՈՒՐԵՐ.com-ի հետ զրույցում «Քաղաքացիական պայմանագիր» խմբակցության պատգամավոր Հովիկ Աղազարյանը վարչապետի խոսքը այսպես մեկնաբանեց.

‹‹Այդ նպատակն իրագործված է  այն կոնտեքստում, որ վերջին երկու համապետական ընտրությունները որևէ մեկի մոտ կասկած չեն հարուցում լեգիտիմության, թափանցիկության իմաստով:

Ժողովուրդն իրացրել  է իր իշխանությունը ընտրությունների միջոցով: Ժողովրդի իշխանություն ասելով՝  շատ դեպքերում  միայն կառավարող ուժն է հասկացվում, բայց ժողովրդի իշխանությունը նաև ձևավորված խորհրդարանն է, որտեղ աշխատում են  կառավարող և ընդդիմադիր ուժերը ու հաշվետու ժամանակահատվածում կատարում իրենց ծրագրերից բխող գործողություններ, ինչի արդյունքում էլ իրացվում է ժողովրդի իշխանությունը››:

Պատասխանելով այն հարցին, թե որքանով է Հայաստանն այսօր իրավական երկիր՝ հաշվի առնելով վերջին ներքաղաքական զարգացումները՝ ընդդիմության և ոստիկանության բախումները, ձերբակալությունները, դրանց փաստական հիմքը, նա նշեց, որ խորությամբ ծանոթ չէ հարուցված գործերին, սակայն դատաիրավական համակարգում այժմ ընթանում է աստիճանական բարելավում:

‹‹Իմ ընդդիմադիր  գործընկերները ներկայացնում են այնպիսի քաղաքական ուժեր և այնպիսի անհատների  շուրջ են համախմբված,  որոնք ֆինանսական խնդիրներ չունեն և ունենալով ճիշտ դատապաշտպաններ՝ այսօրվա դատաիրավական  համակարգում հանգիստ կարող են պաշտպանել իրենց շահերը: Եթե հանկարծ իրավապահ մարմնի որևէ ներկայացուցիչ թույլ է տվել իր իրավունքների այս կամ այն գերազանցում, ապա կարժանանա համապատասխան գնահատականի, այդ թվում՝ իրավական, այդ իմաստով էլ է այսօր վիճակն ուրիշ››,-նշեց Աղազարյանը:

Իսկ թե ինչպես կարող էր իրավական երկրի ԲԴԽ նախագահի նախկին  ժամանակավոր պաշտոնակատարը  նման կերպար լինել, որը բացահայտեց հայտնի ձայնագրությունը, նա սխալ համարեց նման ձանագրությունների հրապարակումը և նշեց, որ մենք գալիս ենք երեկվանից, կրում ենք անցյալի բեռը, որն իր հետևանքներն է թողնում ներկայի վրա:  

‹‹Պարոն Ջհանգիրյանը ավելի երեկվանից է գալիս, քան մյուսները, դատաիրավական համակարգում 45 տարեկանից բարձր  յուրաքանչյուր ոք իր վրա կրում է անցյալի բեռը, որովհետև այն ժամանակ բարքերն ուրիշ են եղել, իրավաբանական են ընդունվել կաշառքով. որտեղի՞ց դատավորներ բերենք, այդքան մասնագետներ գտնենք, որ զերծ լինեն այդ ամենից››,-ասաց պատգամավոը:

Անդրադառնալով կառավարության կողմից Սահմանադրական դատարանի դատավորի պաշտոնում առաջադրված  փաստաբան Սեդա Սաֆարյանի թեկնածությանը, որը  քաղաքական որոշում էր  և  վարչապետ Նիկոլ Փաշինյանը դա տրամաբանական էր համարել, նշեց.

‹‹Անձամբ ճանաչում եմ Սեդա Սաֆարյանին, առիթ եմ ունեցել նրա հետ մի քանի անգամ շփվելու: Կարծում եմ, որ նա շատ լավ թեկնածու է: Եթե  նույնիսկ կառավարությունն է նրան ներկայացրել՝ նրա ինչ-ինչ արժանիքները հաշվի առնելով, միևնույնն է, Սեդա Սաֆարյանն անհատականություն է, և ես վստահ եմ, որ նրա համար առաջնայինը օրենքն ու սահմանադրությունն են լինելու››:

Հ. Աղազարյանը հավելեց, որ դեռ  ճանապարհ կա անցնելու, ամեն դեպքում մենք չենք գալիս ապագայից, այլ գալիս ենք  անցյալից՝ կրելով  երեկվա թերությունների մասնաբաժինը: