Սոցիալական ցանցում վիրավորական պահվածքի համար դատարանը տուգանել է քաղաքացի Մարիամ Հովսեփյանին և հարկադրել, որ նա գրավոր ներողություն խնդրի

Գործարար և հասարակական գործիչ Նարինե Դավթյանի հայցի հիման վրա ՀՀ Արարատի և Վայոց ձորի մարզերի ընդհանուր իրավասության դատարանի հունիսի 30-ի որոշմամբ քաղաքացի Մարիամ Հովսեփյանը Facebook սոցիալական ցանցում կատարած վիրավորանքների համար տուգանվել է 200 հազար դրամի չափով: Դատարանի որոշմամբ նա պարտավորվում է նաև Facebook-ի իր էջում գրավոր ներողություն խնդրել Նարինե Դավթյանից, փոխհատուցել պետական տուրքի և փաստաբանի ծախսերը: Հովսեփյանի նկատմամաբ հայցի քննարկումը տեղի էր ունենում վերջինիս գրանցման վայրի դատարանում: Այս մասին տեղեկանում ենք «Դատալեքս» դատական-տեղեկատվական համակարգից:

 Քաղաքացի Հովսեփյանը, որն իրեն մատուցում է իբրև ՌԴ-ում Հայաստանի նախկին դեսպան Վարդան Տողանյանի մտերիմ անձնավորություն, երկար տարիների ընթացքում հանրային տարածքում հայտնի է պետական և հասարակական կառույցների, քաղաքական գործիչների, լրագրողների և գործարարների նկատմամբ իր վիրավորական, սադրիչ և միակողմանի արտահայտություններով: Հասարակայնությունը հիշում է վերջին տարիների իրադարձությունների վերաբերյալ նրա մակերեսային, իրականությունը խեղաթյուրող և միտումնավոր մեկնաբանությունները:

Շատերը հիշում են սոցիալական ցանցում նրա վիրավորական գրությունները ոչ միայն Նարինե Դավթյանի վերաբերյալ, այլ նաև հարձակումները Մոսկվայում «Առավոտ» թերթի թղթակից Նաիրա Բաղդասարյանի, «Հայ գործարարների ընկերակցության» գործադիր տնօրեն Գոհար Գումաշյանի և ուրիշ հայտնի գործիչների վրա: 

Բայց Նարինե Դավթյանը գնացել է իրավական ճանապարհով, որոշելով ոչ միայն պաշտպանել իր պատիվը, արժանապատվությունը և գործարար համբավը, այլ նաև ցույց տալ հասարակայնությանը, որ այս անձը մարդկանց և որոշակի շրջանակների թյուրիմացության մեջ է գցել:

Հուսանք, որ այս քրեա-իրավական միջոցը կսթափեցնի քաղաքացուն, իսկ նման անձանց  վիրավորական պահվածքին տրված իրավական գնահատականը ընդհանրապես կնպաստի հասարակական դաշտում մթնոլորտի առողջացմանը: