Վթարի է ենթարկվել բանկի կառավարիչը

Այսօր՝ դեկտեմբերի 20-ին, ավտովթար է տեղի ունեցել Արագածոտնի մարզում։ Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 12.00-ի սահմաններում 20-ամյա Դավիթ Անդիկյանը, Երևան–Գյումրի ավտոճանապարհի 56-րդ կմ–ին վարելով «Օպել Վեկտրա» մակնիշի 28 ԼՏ 076 համարանիշի ավտոմեքենան, ընդհարվել է հանդիպակաց երթևեկող, Աշտարակ քաղաքի 38-ամյա բնակիչ Սամվել Թումանյանի վարած «Մերսեդես» մակնիշի 77 ԼԼ 444 համարանիշի ավտոմեքենային։

Վթարի հետևանքով «Օպել Վեկտրա»–ի ուղևոր 17-ամյա Սերյոժա Անդիկյանը մարմնական վնասվածքով տեղափոխվել է Թալինի հիվանդանոց։ Ֆոտոլրագրող Գագիկ Շամշյանը հայտնում է, որ Սամվել Թումանյանն աշխատում է «Ակբա–Կրեդիտ Ագրիկոլ» բանկի Թալինի մասնաճյուղում՝ որպես կառավարիչ։ Ավտոմեքենաները տեղափոխվել են ոստիկանության Թալինի բաժնի տուգանային հրապարակ։ Փաստի առթիվ ոստիկանության Արագածոտնի մարզի քննչական բաժնում նյութեր են նախապատրաստվում։