Երևանի քաղաքապետն ու ՀՀ փոխոստիկանապետը բացեցին Ավանի անձնագրային ծառայության հիմնանորոգված շենքը. ֆոտոռեպորտաժ, տեսանյութ

Դեկտեմբերի 21-ին բացվեց ՀՀ ոստիկանության անձնագրային և վիզաների վարչության Ավանի անձնագրային ծառայության հիմնանորոգված շենքը:

Ինչպես ԼՈՒՐԵՐ.com-ին տեղեկացնում է ֆոտոլրագրող Գագիկ Շամշյանը, շենքի բացման կարմիր ժապավենը կտրելու համար ժամանել էին Երևանի քաղաքապետ Տարոն Մարգարյանն ու ՀՀ ոստիկանապետի տեղակալ Արթուր Օսիկյանը:

Անձնագրային ծառայության շենքի հիմնանորոգումը, որը նախատեսված էր ՀՀ ոստիկանության անձնագրային և վիզաների վարչությունում իրականացվող բարեփոխումների ծրագրով, պայմանավորված է քաղաքացիների սպասարկման ժամանակակից մակարդակ ապահովելու անհրաժեշտությամբ:

Անձնագրային ծառայությունում քաղաքացիների սպասարկումն առավել քաղաքակիրթ, արդյունավետ և թափանցիկ իրականացնելու համար այսօր ստեղծվել են բոլոր նախապայմանները:

Նախկինում ծառայությունում գործում էր ԱՎՎ համակարգչային ցանցին միացված 2 համակարգիչ. վերանորոգումից հետո հատկացվել է ևս 4 համակարգիչ: Նախկինում անձնագրավարները գործառույթներն իրականացնում էին ըստ իրենց կողմից սպասարկվող տարածքների, ներկայումս ծառայություն դիմած քաղաքացիները սպասարկվելու են ըստ իրենց անհրաժեշտ ծառայությունների՝ ավելի արագ և առանց ավելորդ քաշքշուկների:

Անձնագրային խմբում աշխատանքները կազմակերպվել են դահլիճի սկզբունքով՝ ապակեպատ աշխատանքային խցիկներով՝ քաղաքացիների սպասարկման թափանցիկությունն ապահովելու նպատակով:

Տեղադրվել է անձնագրային ծառայությունների մատուցման համար նախատեսված պետական տուրքերը, վարչական տուգանքները և այլ վճարներն ընդունող էլեկտրոնային վճարային տերմինալ, ինչի շնորհիվ քաղաքացիների սպասարկումը զգալիորեն արագացել է:

Աշխատակիցների և այցելուների համար ստեղծվել են արդի պահանջներին համահունչ կոմունալ հարմարություններ, իսկ ծառայություն դիմող հաշմանդամների հարմարավետ մուտքն ապահովելու նպատակով կառուցվել է սայլակի հարթակ:

Ծառայությունում գործում է նաև լոկալ ջեռուցման համակարգ:

Բարեփոխումների արդյունքում զգալիորեն կբարձրանա քաղաքացիների սպասարկման մակարդակը և կբացառվեն կոռուպցիոն ռիսկերը:

Շենքի նորոգման և տեխնիկական վերազինման աշխատանքներն իրականացվել են ՀՀ ոստիկանության անձնագրային և վիզաների վարչության արտաբյուջետային միջոցների հաշվին՝ առանց պետական բյուջեի միջոցների ներգրավման:

Ընդհանուր ծավալով ծախսերը կազմել են 13.005,0 հազար դրամ, այդ թվում՝ շիննորոգման աշխատանքներ՝ 11.445,0 հազար դրամ, համակարգչային տեխնիկա՝ 728,0 հազար դրամ, գույք՝ 832,0 հազար դրամ:

2012 թ. ընթացքում արտաբյուջետային միջոցների հաշվին նախատեսվում է իրականացնել անձնագրային և վիզաների վարչության Մասիսի անձնագրային բաժանմունքի նոր մասնաշենքի կապիտալ շինարարության աշխատանքները:

Լուսանկարները և տեսանյութը՝ Գագիկ Շամշյանի

{gallery}shamshyan/Bacum-1{/gallery}