Երևան–Գյումրի ավտոճանապարհին «Գազել»-ը մի քանի անգամ շրջվել է. կա 1 զոհ, 9 վիրավոր (ԹԱՐՄԱՑՎԱԾ` Ֆոտո)

Այսօր՝ դեկտեմբերի 21–ին, ավտովթար է տեղի ունեցել Շիրակի մարզում։ Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 17։30–ի սահմաններում Երևան-Գյումրի ավտոճանապարհի 90-րդ կմ-ում՝ Լանջիկ գյուղի մոտակայքում, «Գազել» մակնիշի, 09 20 Լ համարանիշի մեքենայի վարորդը շրջվել է ավտոմեքենայով։  Վթարի հետևանքով վարորդը և յոթ ուղևորները, այդ թվում՝ մեկ երեխա, մարմնական ծանր վնասվածքներով տեղափոխվել են Գյումրիի Գյուլբենկյանի անվան հիվանդանոց։

 Այս պահին ժամանել են Գյումրիի շտապօգնության մի քանի բրիգադներ և ճանապարհային ոստիկանության 2–րդ սպայական գումարտակի 2–րդ դասակի 2–րդ վաշտի մեծ թվով աշխատակիցներ՝ հրամանատար Գևորգ Դավթյանի գլխավորությամբ։ 

Վիրավորներին ավտոմեքենայից դուրս են բերել ճանապարհային ոստիկանները, քաղաքացիներն ու շտապ օգնության աշխատակիցները։ «Գազել»-ը վթարից հետո երկու–երեք անգամ շրջվել է։ Արդեն ժամանել են ոստիկանության  քննչական գլխավոր վարչության Շիրակի մարզային բաժանմունքի քննիչները։ Փաստի առթիվ ոստիկանության Շիրակի մարզի քննչական բաժնում նյութեր են նախապատրաստվում։

Ֆոտոլրագրողը հայտնում է, որ Թալինից դեպի նշված հատվածը ողջ ճանապարհը մերկասառույց է, իսկ քաղաքացիները բողոքում են, որ «Ճանշին»–ը մատը մատին չի խփել, ոչ մի աշխատանք չի արվել։

Քիչ առաջ ֆոտոլրագրող Գագիկ Շամշյանը տեղեկացրեց, որ հիվանդանոց տեղափոխվածներից 74-ամյա Շուշանիկ Սուվարյանը մահացել է, իսկ վիրավորներն են 27-ամյա Վարուժան Բիշարյանը, 51-ամյա Անահիտ Աբրահամյանը, 33-ամյա Արմինե Ստեփանյանը, 44-ամյա Կարինե Բեռնեցյանը, 50-ամյա Խաչատուր Աբրահամյանը, 24-ամյա Համիկ Աբրահամյանը, 7-ամյա Մանե Խաչատրյանը, 30-ամյա Քրիստինե Սուքիասյանը և Գայանե Ավագյանը, ով հիշողության կորստի պատճառով տվյալներ չի կարողանում հայտնել, այս պահին գտնվում են Գյումրիի Գյուլբենկյանի անվան հիվանդանոցի վերակենդանացման բաժանմունքում։ «Գազել»–ը վարել է Երևանի Ներքին Շենգավիթ 11 փողոցի բնակիչ 51-ամյա Գագիկ Նիկոլյանը, ով աշխատում է Բագրատունյաց 47/8 հասցեում գործող «Տիգրան» ՍՊԸ–ում՝ որպես վարորդ։

{gallery}shamshyan/gazel-21.12.11{/gallery}