Արարատի մարզի ոստիկանները «տաք հետքերով» բացահայտեցին այսօր կատարված սպանությունը (ՖՈՏՈ, ՏԵՍԱՆՅՈՒԹ)

Այսօր՝ դեկտեմբերի 23-ին, ոստիկանության Արարատի մարզային վարչության և Մասիսի բաժնի օպերատիվ խումբը բացահայտեց այսօր Մասիսում տեղի ունեցած սպանությունը:

Ինչպես ավելի վաղ դեպքի վայրից ԼՈՒՐԵՐ.com-ին հայտնել է ֆոտոլրագրող Գագիկ Շամշյանը, գիշերը՝ 01.40-ի սահմաններում, Մասիսի հիվանդանոցից ոստիկանության Մասիսի բաժին հայտնել էին, որ մահացած վիճակում իրենց մոտ էր տեղափոխվել մի երիտասարդ:

Այսօր՝ առավոտյան, ոստիկանության Արարատի մարզային վարչության և Մասիսի բաժնի աշխատակիցների կողմից ստեղծվել էին երեք օպերատիվ խմբեր՝ Արարատի մարզային վարչության պետի օպերգծով տեղակալ Եգոր Անտոնյանի, Մասիսի ոստիկանության պետ Համլետ Ղամբարյանի և ոստիկանության քննչական գլխավոր վարչության Արարատի մարզի քննչական բաժնի պետ Թեմուր Ջնդոյանի գլխավորությամբ:

Ձեռնարկված օպերատիվ-քննչական գործողությունների արդյունքում քիչ առաջ ոստիկանության օպերատիվ-քննչական խումբը, սպանություն կատարելու կասկածանքով, Մասիսի ոստիկանություն բերման ենթարկեց 27-ամյա Արմեն Քալաշյանին, ով ոստիկաններին մատնացույց արեց այն վայրը, որտեղ նետել է հանցագործության գործիք հանդիսացող խոհանոցային դանակը:

Այս պահին արդեն ավագ քննիչ Սամվել Անդրեասյանի կողմից ընթերականների ներկայությամբ Մասիսի հիվանդանոցին հարակից տարածքից մթերային խանութի հետնամասում առգրավվեց արյունոտ դանակը: Ֆոտոլրագրող Գագիկ Շամշյանը հայտնում է, որ ավագ քննիչի որոշմամբ Արմեն Քալաշյանը ձերբակալվել է:

Դանակն առգրավվել և ուղարկվել է ոստիկանության փորձաքրեագիտական կենտրոն: Նշանակվել են մի շարք փորձաքննություններ: Սպանվածն ու նրան սպանած կասկածյալը հարազատ եղբայրներ են: Թե ինչն էր եղել սպանության պատճառը, նախաքննության շահերից ելնելով, այս պահին, ֆոտոլրագրողը որոշ մանրամասներ չի հայտնում:

Լուսանկարները և տեսանյութը՝ Գագիկ Շամշյանի

{gallery}shamshyan/Spanutyun-1{/gallery}