Կոտայքի բաժնի ոստիկաններն Առինջ գյուղի գերեզմանատանը հայտնաբերել են պահակի մոխրացած դին (ՖՈՏՈ)

Այսօր՝ դեկտեմբերի 29-ին, դժբախտ պատահար է տեղի ունեցել Կոտայքի մարզում։

Ինչպես դեպքի վայրից ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, ժամը 09.30-ի սահմաններում ոստիկանության Կոտայքի բաժին ահազանգ է ստացվել այն մասին, որ Առինջ գյուղի գերեզմանների մոտ գտնվող վագոն–տնակում հրդեհ է տեղի ունեցել։ Դեպքի վայր են ժամանել Արտակարգ իրավիճակների նախարարության Հայաստանի փրկարար ծառայության Երևանի հրշեջ – փրկարարական ջոկատը՝ 2 մարտական հաշվարկով։

Այս պահին դեպքի վայր են ժամանել ոստիկանության Կոտայքի բաժնի օպերատիվ խումբը՝ ոստիկանության Կոտայքի բաժնի պետ Խաչիկ Ավետիսյանի գլխավորությամբ։ Մինչ հրշեջները կմարեին կրակը, ոստիկանության Կոտայքի բաժնի աշխատակիցները պարզեցին, որ նշված վագոն-տնակը պատկանում է «Հուշարձան» ՍՊԸ–ին, որի մեջ ամբողջությամբ այրվել, մոխրակույտի է վերածվել նշված ՍՊԸ–ի պահակ, Երևանի Նոր Նորք վարչական շրջանի Դավիթ Մալյան փողոցի բնակիչ 49-ամյա Մարգար Դավթյանը։

Վագոն–տնակն ամբողջովին մոխրակույտի է վերածվել, իսկ նրա հարևանությամբ հայտնաբերվել է նրա շունը, բգախեղդ եղած վիճակում։ Արդեն դեպքի վայր են ժամանել դատական բժիշկն ու փորձագետը։ Փաստի առթիվ ոստիկանության քննչական գլխավոր վարչության Կոտայքի բաժնի քննչական բաժանմունքում նյութեր են նախապատրաստվում։

Լուսանկարները՝ Գագիկ Շամշյանի

{gallery}shamshyan/Arinj{/gallery}