Կոտայքի ոստիկաններն «Էլլա» գիշերային ակումբում հայտնաբերել են «Էլիզա» գիշերային ակումբի տնօրենին սպանողին (ՖՈՏՈ, ՏԵՍԱՆՅՈՒԹ)

Երեկ՝ դեկտեմբերի 28-ին, ոստիկանության Կոտայքի բաժնի աշխատակիցները, իրացնելով օպերատիվ տվյալները, հայտնաբերել են հետախուզման մեջ գտնվող մի երիտասարդի։

Ինչպես ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, այդ երիտասարդը 24-ամյա Երևանի բնակիչ Հրանտ Ալոյանն է, ով մեղադրվում է ՀՀ քրօր–ի 104 հոդվածի 1-ին մասի (սպանություն) հատկանիշներով։ Այս տարվա հոկտեմբերի 3-ին ոստիկանության Քանաքեռ–Զեյթունի բաժին ահազանգ էր ստացվել, որ Միքայելյանի անվան վիրաբուժության ինստիտուտի մոտ կայանված է «ՎԱԶ 2121» մակնիշի 90 ԼՍ 900 համարանիշի ավտոմեքենա, որի մեջ կա տղամարդու դիակ։

Պարզվել էր, որ մահացածը Այնթափ գյուղի բնակիչ 37-ամյա Հայկ Հովակիմյանն էր, ով Երևան–Արտաշատ ավտոճանապարհի վրա գործող «Էլիզա» գիշերային ակումբի սեփականատերն էր։ Ոստիկանությունը պարզել էր, որ մինչև նրան սպանելը Աբովյան քաղաքում Ճարտարագիտական քոլեջի մոտակայքում վիճաբանություն էր տեղի ունեցել նրա և Հրանտ Ալոյանի միջև, որի ժամանակ Հ. Ալոյանը բռունցքով հարվածել էր Հ. Հովակիմյանի դեմքին՝ պատճառելով մահ։ Այնուհետև Հովակիմյանին պատկանող «Նիվա» մակնիշի ավտոմեքենայով նրա դին տեղափոխել էր հիվանդանոց, թողնելով բակում՝ հեռացել։

Վիճաբանության դրդապատճառը եղել է գիշերային ակումբի պարուհին։ Ֆոտոլրագրողը հայտնում է, որ Կոտայքի բաժնի ոստիկանները Հ. Ալոյանին հայտնաբերել են Երևանի Սասունցի Դավիթ կայարանի մերձակայքում գործող «Էլլա» գիշերային ակումբից։ Նրա հետ է եղել նաև այն աղջիկը, ում համար տեղի էր ունեցել ծեծկռտուքը, որն ավարտվել էր մահվամբ։ Այս պահին Հ. Ալոյանը տեղափոխվեց ՀՀ արդարադատության նախարարության Նուբարաշեն քրեակատարողական հիմնարկ։

Լուսանկարները և տեսանյութը՝ Գագիկ Շամշյանի

{gallery}shamshyan/mardaspan{/gallery}