Բացահայտվել է ավազակախումբ. նրանք փորձել էին հափշտակել 93 միլիոն դրամ. կազմակերպիչը ոստիկանության զորքերի աշխատակից է (ՖՈՏՈ, ՏԵՍԱՆՅՈՒԹ)

Երեկ՝ դեկտեմբերի 28-ին, ՀՀ ոստիկանության քրեական հետախուզության գլխավոր վարչության, ոստիկանության Երևան քաղաքի վարչության աշխատակիցները ձերբակալել են հանցավոր մի խմբավորման անդամների։ Ինչպես ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, նշված խմբի մեջ է ոստիկանության զորքերի աշխատակից Գևորգ Հովակիմյանն ու նրա հայրը՝ Ռադիկ Հովակիմյանը։ Մյուս անդամներին քրեական հետախուզության գլխավոր վարչության և Երևան քաղաքի վարչության աշխատակիցները հայտնաբերել և ձերբակալել են Վաղարշապատում եղբայրներ Դավիթ և Վարդան Սարգսյաններին։ 

Այս տարվա ապրիլի 27-ին՝ ժամը 14.00-ի սահմաններում, Երևանում զինված անձինք Ծարավ Աղբյուրի փողոցում փորձել էին ավազակային հարձակում կատարելու եղանակով հափշտակել ՀՀ ոստիկանության զորքերի աշխատավարձ տեղափոխող ԳԱԶ-24 մակնիշի ավտոմեքենայով տեղափոխվող 93 մլն դրամը:

Հանցագործները, հանդիպելով ոստիկանության զորքերի ծառայողների դիմադրությանը, դիմել էին փախուստի:

Փաստի առթիվ ոստիկանության քննչական գլխավոր վարչության Նոր Նորքի քննչական բաժնում քրեական գործ էր հարուցվել ՀՀ քր.օր.-ի 175 հոդվածի (Ավազակային հարձակում) հատկանիշներով:

Ֆոտոլրագրողը պատմում է, երբ դեռ այն ժամանակ ինքը հանցագործության վայրում լուսատեսաձայնագրման աշխատանքներ էր կատարում, նշված հանցագործությունը բացահայտելու համար որոշ հեռուստաընկերություններ դեպքի վայր էին հրավիրել գուշակների անգամ Մոսկվայից և ոստիկաններին համոզում էին, թե հանցագործությունը կբացահայվի գուշակների շնորհիվ։ Բարեբախտաբար ոստիկանության աշխատակիցները չտարվեցին գուշակություններով։ Երբ ՀՀ ոստիկանապետ, գեներալ–լեյտենանտ Վլադիմիր Գասպարյանը հանդիպել էր Ոստիկանության քրեական հետախուզության գլխավոր վարչության և Երևանի վարչության աշխատակիցների հետ կտրուկ հանձնարարականներ էր տվել, որ չբացահայտվող հանցագործություններ չկան, հետևաբար ամեն մի հանցագործություն՝ մանր, թե աղմկահարույց, պետք է բացահայտվեն։ Ֆոտոլրագրողը հայտնում է նաև, որ հանցագործությունը նախօրոք պլանավորված է եղել ոստիկանության զորքերի աշխատակից Գևորգ Հովակիմյանի կողմից, ով լավ իմանալով, որ այդ օրը տեղափոխվելու է ոստիկանության զորքերի աշխատավարձը, իր հոր, Դավիթ և Վարդան Սարգսյանների հետ փորձել են հափշտակել խոշոր գումարը։ Դավիթ և Վարդան Սարգսյանների տանից հայտնաբերվել է նաև հրազեն։ Խմբի մեջ կան նաև այլ անդամներ, որոնց մասնակցությունը կատարված հանցագործության մեջ պետք է պարզի նախաքննական մարմինը։ Ֆոտոլրագրողը հայտնում է, որ իր տեղեկություններով հարուցված քրեական գործը այսօր արդեն ուղարկվել է Հայաստանի հատուկ քննչական ծառայություն։ Նախաքննության շահերից ելնելով՝ որոշ մանրամասներ ֆոտոլրագրողը չի հրապարակում։ Ներկայացնում ենք դեպքի վայրում արված լուսանկարներն ու տեսանյութը։

Լուսանկարներն ու տեսանյութը՝ Գագիկ Շամշյանի։

{gallery}shamshyan/GAZ-24{/gallery}