Կրակոցներ տաքսի ծառայության վրա, հայտնաբերվել է ավտոմատի 28 պարկուճ (ՖՈՏՈ)

Ոստիկանության քննչական գլխավոր վարչության Արաբկիրի քննչական բաժնում քրեական գործ է հարուցվել ՀՀ Քր. Օր.-ի 258 հոդվածի 4-րդ մասի (խուլիգանությունը) և 235 հոդվածի 1-ին մասի (ապօրինի զենք-զինամթերք կրելը, պահելը և օգտագործելը) հատկանիշներով:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, դեկտեմբերի 30-ին՝ ժամը 03:50-ի սահմաններում, կրակոցներ են հնչել Արաբկիր վարչական շրջանի Ն. Տիգրանյան փողոցում գտնվող «Բիզե» տաքսի ծառայությունում: Դեպքի վայր են մեկնել ոստիկանության Արաբկիրի բաժնի օպերատիվ խումբը՝ Արաբկիրի ոստիկանապետ, ոստիկանության գնդապետ Արթուր Մեհրաբյանի գլխավորությամբ: Դեպքի վայրում ոստիկանության օպերատիվ-քննչական խումբը հայտնաբերել և առգրավել է «ԱԿՍ-74» տիպի ինքնաձիգից արձակված 28 հատ 5,45 միլիմետր տրամաչափի կրակված պարկուճ:

Դեպքի վայրում հավաքվածները ֆոտոլրագրողին պատմել են, որ գիշերը «Ռենջ Ռովեր» մակնիշի 30 ՕՏ 296 համարանիշի ավտոմեքենայով անհայտ անձը նախ վնասել է տաքսի ծառայության երկաթյա դարպասը, ապա ավտոմատով կրակոցներ արձակել ծառայության ուղղությամբ:

Բարեբախտաբար, զոհեր և վիրավորներ չեն եղել:

Ֆոտոլրագրողին հայտնի է դարձել, որ Արաբկիրի ոստիկանության ձեռնարկած օպերատիվ-քննչական գործողությունների արդյունքում հայտնաբերվել է «Ռենջ Ռովեր» մակնիշի ավտոմեքենան և կրակոցներ արձակած անձը, որը Երևանի բնակիչ, 28-ամյա Նարեկ Ենոքյանն է: Վերջինս, քննիչի որոշմամբ, ձերբակալվել է:

Ոստիկանության Արաբկիրի բաժնի աշխատակիցները ձեռնարկում են օպերատիվ գործողություններ, որպեսզի հայտնաբերվեն նաև ինքնաձիգները:

Լուսանկարները՝ Գագիկ Շամշյանի։

{gallery}shamshyan/Krakoc-Taxi{/gallery}