Մասիսի ոստիկանները հայտնաբերել են մահվան ելքով վրաերթ կատարողին (ԼՐԱՑՎԱԾ՝ ՖՈՏՈ, ՏԵՍԱՆՅՈՒԹ)

Այսօր՝ հունվարի 4-ին, ոստիկանության Մասիսի բաժնի աշխատակիցները հայտնաբերել են երեկ՝ հունվարի 3-ին, մահվան ելքով վրաերթ կատարող վարորդին։ Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ոստիկանության Մասիսի բաժնի աշխատակիցներն օպերատիվ տվյալներն իրացնելիս Արարատի մարզի Արգավանդ գյուղում հայտնաբերել են Արարատի մարզի Ղուկասավան գյուղի բնակիչ 40-ամյա Կարեն Ղուկասյանին։

Մասիսի ոստիկանները ոստիկանության Մասիսի բաժնի տուգանային հրապարակ են տեղափոխել նաև նրա կողմից վարած «Մերսեդես E» մակնիշի 111 ԼԼ 90 համարանիշի ավտոմեքենան։ Ավտոմեքենայի դիմապակին և դիմացի հատվածն ամբողջովին վնասված է։ Պարզվել է, որ վրաերթը կատարել է Կ. Ղուկասյանը նշված ավտոմեքենայով և վրաերթի ենթարկվածին թողնելով անօգնական՝ դիմել էր փախուստի։

Ինչպես երեկ հայտնել էր ֆոտոլրագրող Գագիկ Շամշյանը, վրաերթը տեղի էր ունեցել ժամը 20.00-ի սահմաններում՝ Էջմիածին–Մասիս–Ջորակ գյուղի հատվածում. վրաերթի էր ենթարկվել նույն գյուղի բնակիչ Արմեն Առաքելյանը։ Փաստի առթիվ ոստիկանության քննչական գլխավոր վարչության Մասիսի քննչական բաժանմունքում հարուցվել է քրեական գործ ՀՀ քրօր–ի 242 հոդվածի 2-րդ մասի (ավտոտրանսպորտային պատահար, որն առաջացրել է մարդու մահ) և 244 հոդվածի (դեպքի վայրից փախուստի դիմելը) հատկանիշներով։ Այս պահին քննիչի որոշմամբ Կ. Ղուկասյանը ձերբակալվել է։

Լուսանկարները և տեսանյութը՝ Գագիկ Շամշյանի։

{gallery}shamshyan/111-09{/gallery}