«Միսս աշակերտուհի 2013». գեղեցկության եվ շնորհալիության մրցույթի 1-ին փուլ (ֆոտոշարք)

Նոյեմբերի 21-ին տեղի ունեցավ «Միսս աշակերտուհի-2013» գեղեցկության եվ շնորհալիության մրցույթ-փառատոնի առաջին փուլը, որը պայմանականորեն կոչվում էր ճանաչողական փուլ, տեղեկանում ենք petrosyangarik.blogspot.com-ից: Այս տարի մրցույթում, որն արդեն կազմակերպվում է 14-րդ անգամ, ընդգրկված են մասնակիցներ Հայաստանից, Ռուսաստանից և Սիրիայից։

Մրցույթի կազմակերպչական աշխատանքները փայլուն կատարեցին դեֆիլեի ղեկավար Ռուզաննա Գալստյանը, պարուսույց Աննա Կարապետյանը, հանդիսավար Անի Մանթաշյանը, պրոդյուսերներ Արթուր Գևորգյանը, Աննա և Արաքսյա Օհանյանները, ինչպես նաև տնօրեն Նորա Կարապետյանը։ Բավականին ներկայացուցչական էր նաև ժյուրիի կազմը։ Ժյուրիի վետերաններ՝ «Ստեպ-Դենտ» ստոմոտոլոգիական կլինիկայի տնօրեն Պարգև Ստեփանյանին և լեզվաբան Անահիտ Ալեքսանյանին արդեն երկրորդ անգամ միացել էին ընտանեկան բժիշկ Նաիրա Միքայելյանը և ՀԱՕԿ իրավաբան և փաստաբանների պալատի ներկայացուցիչ Հասմիկ Վարդանյանը։ Ժյուրիում առաջին անգամ էին նաև մրցույթի նախկին հաղթողները «Միսս աշակերտուհի-2005» և 2007 թթ. հաղթող, իսկ այժմ ՀՀ ոստիկանության աշխատակից Լիանա Քարամյանը, և մրցույթի անցյալ տարվա հաղթող, իսկ այժմ սիրված դերասանուհի, «Արմենիա» հեռուստաընկերության եթերով հեռարձակվող «Եռաչափ սեր» երիտասարդական սերիալի գլխավոր դերակատարուհի «Միսս աշակերտուհի-2012» Եվա Բաղդասարյանը։ Ժյուրիում անակնկալ էր նաև հրաշալի երգչուհի փոքրիկ Դալիթայի ներկայությունը, որն այս տարի Միսս աշակերտուհի գրասենյակի կողմից արժանացել էր «Միսս կատարելություն» տիտղոսին և կարծես դարձել է մրցույթի խորհրդանիշը՝ նա էլ իր նոր երգով բացեց մրցույթի առաջին փուլը։ Ժյուրիի վերջին ներկայացուցիչները «Շանթ» հեռուստաընկերության երկու հիանալի նախագծերի՝ «Հայ սուպերսթար»-ի և «Պարիր, թե կարող ես»-ի հաղթողներն էին։ Մեր շատ սիրելի ու տաղանդավոր երգչուհի Սուսաննա Պետրոսյանը, և, ինչպես մրցույթի հիմնադիր Գարիկ Պետրոսյանն է ներկայացնում, տիեզերական մասշտաբի գեղեցկությամբ օժտված պարուհի Մարի Հովհաննիսյանը։ Հենց ժյուրի այս կազմն էլ գնահատեց մրցույթի մասնակիցներին։