The Wall Street Journal. Կատալոնիան անկախության ճանապարհի՞ն է (տեսանյութ)

Վերջին լուրեր 24 Նոյեմբեր, 2012 22:58

Նոյեմբերի 25-ին կատալոնացիները մասնակցելու են նոր շրջանային ժողովի ընտրություններին, ինչը կարող է նշանակալից հետևանքներ ունենալ Կատալոնայի և Իսպանիայի մնացած մասի համար:

Կատալոնիայում կիրակի օրվա ընտրությունները կարող են այս հարուստ հյուսիսային շրջանին դնել անկախության ճանապարհի վրա՝ հավանաբար առաջ բերելով սահմանադրական ճգնաժամ Իսպանիայում, գրում է The Wall Street Journal-ը:

Կիրակի օրը կայանալիք ընտրությունները Կատալոնիայում կարող են հանգեցնել Իսպանիայից անկախություն ձեռք բերելու վերաբերյալ հանրաքվեի անցկացմանը՝ խորացնելով երկրի տնտեսական դժվարությունները:

Կատալոնյան անջատողական կուսակցությունները, որոնք ցանկանում են անջատվել Իսպանիայից, մեծ հավանականություն ունեն հաղթելու Կատալոնիայի խորհրդարանի ընտրություններում, և ներկայիս Կատալոնիայի նախագահ Արթուր Մասը ամենայն հավանականությամբ կշարունակի մնալ իր պաշտոնում: Նրա աջ կենտրոնամետ դաշինքը՝ «Մերձեցում և միություն» («Convergència i Unió») (CiU) կուսակցությունը, ամենայն հավանականությամբ կրկին կշահի մեծամասնությունը, բայց կկորցնի այն բացարձակ մեծամասնությունը, որ ուներ ձախակողմյան անկախ Հանրապետական «Esquerra» կուսակցության նկատմամբ:

Կատալոնիայի նախագահ Արթուր Մասը անկախության կողմնակիցներից մեկն է, հաղորդում է euronews-ը:

Մասն էր, ով անցյալ սեպտեմբերին վաղաժամ ընտրությունների կոչ արեց այն բանից հետո, երբ Բարսելոնան և Մադրիդը չկարողացան համաձայնության գալ նոր վարկային պայմանագրի շուրջ:

Կատալոնական կառավարությունը ցանկանում է շրջանի հարկերը հավաքելու և տնօրինելու իրավունք ստանալ դրանք Մադրիդին փոխանցելու փոխարեն, ինչպես որ հիմա է դա անում:

Իսպանիայի նախագահ Մարիանո Ռախոյը դեմ է հանդես գալիս այս քայլին: Այս խոսքերից հետո էլ Մասը հայտարարեց, որ ավելի լավ կլինի, եթե ստեղծվի «իրենց սեփական պետությունը»: Եթե նոր կատալոնյան խորհրդարանը, ինչպես սպասվում է, ունենա անկախության մեծ թվով (2/3) համակիրներ, դա ուղի կստեղծի Կատալոնիայի անկախության հանրաքվեի համար՝ չնայած Մադրիդի ուժեղ ընդդիմությանը:

Կատալոնիան՝ Իսպանիայի 17 շրջաններից մեկը, ապահովում է Իսպանիայի տնտեսության 1/5 մասը, ինչն իր հերթին եվրագոտու 4-րդ ամենախոշոր տնտեսությունն է: