Սթափության կոչ ՀՅԴ «Նիկոլ Աղբալյան» ուսանողական միությանը

«Ժառանգություն» կուսակցության «Հայք» երիտասարդական-ուսանողական միությունն արձագանքեց «Նիկոլ Աղբալյան» ուսանողական միության հայտարարությանը: Տարածված հաղորդագրության մեջ մասնավորապես ասվում է.

«Զարմանքով ընթերցեցինք ՀՅԴ «Նիկոլ Աղբալյան» ուսանողական միության հայտարարությունը Բաքվում Րաֆֆի Հովհաննիսյանի արած հայտարարությունների կապակցությամբ: Նախ նշենք, որ դաշնակցական երիտասարդները չափից մեծ իրավունք են վերապահում իրենց՝ Րաֆֆի Հովհաննիսյանից բացատրություններ պահանջելով: Ափսոսում ենք, որ «Նիկոլ Աղբալյանի» երիտասարդները ձայնակցում են այն հիստերիային, որը բարձրացրել են ադրբեջանական լրատվամիջոցները, իշխանական ու ընդդիմադիր գործիչները Րաֆֆի Հովհաննիսյանի հայտարարությունների կապակցությամբ: Հետաքրքիր զուգադիպությամբ վերջինի հանդեպ նմանատիպ մեղադրանքներ հնչեցրեցին նաեւ «Կենտրոն» հեռուստաընկերության լրատվական հաղորդումը եւ «Չորրորդ ինքնիշխանություն» թերթը:

Ինչ վերաբերում է «Նիկոլ Աղբալյանի» անդամների մտահոգություններին, ապա քանի որ նրանք չեն կոնկրետացնում, թե Րաֆֆի Հովհաննիսյանի որ հայտարարությունն է ըստ իրենց «պարարտ հող պատրաստում իշխանությունների համար՝ հնարավոր պարտադրված ստորագրման դեպքում հասարակական բարենպաստ կարծիք ձեւավորելու համար», ստիպված ենք անդրադառնալ Ր.Հովհաննիսյանի՝ Բաքվում հնչեցրած մի շարք մտքերի:

Նա, օրինակ, լրատվամիջոցներին ասել է (մեջբերում ենք). «Բոլոր ազգությունների բոլոր փախստականները պետք է իրավունք ունենան վերադառնալ իրենց բնակավայրերը, դա վերաբերում է Ադրբեջանին, Լեռնային Ղարաբաղի Հանրապետությանը, Հայաստանին, Թուրքիային... Սակայն դա պետք է տեղի ունենա նրանց համար անվտանգության երաշխիքներ ապահովելուց եւ ԼՂՀ հիմնախնդիրը լուծելուց հետո»: Ապա ավելացրել. «Այդ վերադարձն անվտանգ դարձնելու համար մեզ պետք է նոր միջավայր, բարենպաստ մթնոլորտ, փոխվստահության կառուցում, ինչին չենք կարող հասնել դատապարտված մարդասպանին բաց թողնելով, գերեզմաններ պծղելով եւ ոչ էլ, հատկապես, նախագահի մակարդակով վիրավորական խոսքեր հնչեցնելով հարեւան երկրների մասին։ Դա ոչնչի չի հասցնի: Մենք կարող ենք ապրել յուրաքանչյուրս մեր իրականության մեջ՝ տարածելով մամուլի հաղորդագրություններ, մեր դիրքորոշման մասին թղթեր, սակայն, եթե մենք լուծում ենք ցանկանում, ապա նոր հարաբերությունների եւ երկխոսության նոր չափանիշների կարիք ունենք»։

Պարզ չէ, թե այստեղ հատկապես ո՞ր հատվածն է անընդունելի մեր դաշնակցական երիտասարդ գործընկերների համար: Այն, որ բոլոր փախստականները որոշակի պայմաններ ապահովելու դեպքում եւ ԼՂՀ խնդիրը լուծելուց, այն է՝ անկախությունը ճանաչելուց հետո պետք է իրավունք ունենան վերադառնալ իրենց բնակավայրե՞րը: Բայց դա նաեւ ԼՂՀ իշխանությունների պաշտոնական դիրքորոշումն է, ըստ որի՝ այն ադրբեջանցի փախստականները, ովքեր կընդունեն ԼՂՀ քաղաքացիություն, իրավունք կստանան վերադառնալ իրենց բնակավայրերը: Եթե ԼՂՀ իշխանությունների նման դիրքորոշումը եւս անընդունելի է «Նիկոլ Աղբալյանի» անդամների համար՝ իրենք պետք է դժգոհեն ոչ թե Րաֆֆի Հովհաննիսյանից կամ «Ժառանգությունից», այլ ԼՂՀ-ի ՀՅԴ-ից, որն այժմ արցախյան կառավարության մաս է կազմում: Իսկ Րաֆֆի Հովհաննիսյանը նաեւ հատուկ նշել է, որ ԼՂՀ տարածքային ամբողջականությունը պետք է հարգվի: Ի դեպ, «Ժառանգությունը» միշտ էլ հստակորեն իր դիրքորոշումը հայտնել է առ այն, որ Արցախի տարածքային ամբողջականություն ասելով հասկանում է ԼՂՀ սահմանադրությամբ ամրագրված տարածքներն ու սահմանները:

Իսկ միգուցե երիտասարդ դաշնակցականների համար անընդունելի են Րաֆֆի Հովհաննիսյանի հետեւյալ խոսքերը. «Ադրբեջանն էլ նոր պետություն է. կարծում եմ՝ հետխորհրդային տարածքում տարածքային ամբողջականության սահմանները վիճելի են, դրանք բանակցային գործընթացի նյութ են։ Բայց մի բան ինձ համար հստակ է՝ բոլոր պետությունները՝ հին թե նոր, ճանաչված թե ոչ, այդ թվում՝ եւ Լեռնային Ղարաբաղի Հանրապետությունը, ունեն ճանաչման իրավունք եւ Ադրբեջանը լավ կանի առաջինը ճանաչի... ԼՂ հասարակությունը սահմանադրական ճանապարհով ստեղծել է իր հանրապետությունը եւ ունի ինքնորոշման եւ անվտանգ ապրելու իրավունք»: Մենք հասկանում ենք, որ գուցե երիտասարդ դաշնակցականները շատ կցանկանային, որ այս բառերը հնչեցրած լինեին երբեւէ Բաքու այցելած իրենց ավագ կուսակիցները: «Ժառանգությո՞ւնն» է մեղավոր, որ դա տեղի չի ունեցել:

Մադրիդյան սկզբունքներից հետին թվով դժգոհող երիտասարդ դաշնակցականները եւս սխալ հասցեով են ուղղում իրենց մտահոգությունները. «Ժառանգությունը» միշտ էլ հայտարարել է, որ այդ սկզբունքներն անընդունելի են մեզ համար, մինչդեռ 2007թ. նոյեմբերի 29-ին, երբ դրանք ընդունվեցին Հայաստանի իշխանությունների կողմից ՀՅԴ-ն մաս էր կազմում ՀՀ կոալիցիոն կառավարությանը եւ համամիտ էր այդ սկզբունքներին, այլապես դուրս կգար կառավարությունից՝ չկիսելու համար այդ սկզբունքների ընդունման համար իշխանությունների պատասխանատվությունը, ինչը օրինակ, արեց 2009թ.-ին՝ ՀՀ իշխանությունների կողմից հայ-թուրքական արձանագրությունների ստորագրումից հետո: Որտեղի՞ց էր ֆինանսավորվում ՀՅԴ-ն, որ համաձայնեց Մադրիդյան սկզբունքներին: Նաեւ երբ «Ժառանգության» երիտասարդները Հայաստանով մեկ ակցիաներ էին անում ընդդեմ Մադրիդյան սկզբունքների' չենք հիշում, որ «Նիկոլ Աղբալյան» ուսանողական միությունը նման բոցաշունչ հայտարարություն տարածեր, որով բացատրություն պահանջեր սեփական կուսակցության ղեկավարությունից այդ մերժելի սկզբունքների ընդունման համար:

Րաֆֆի Հովհաննիսյանի քաղաքական հետագիծը ինքն է խոսում իր մասին եւ ցավում ենք, որ թշնամու քարոզչական հարձակումներին հակադարձելուց զատ ստիպված ենք նաեւ պատասխանել հայրենակից գործընկերներին: Կոչ ենք անում երիտասարդ դաշնակցականներին այսուհետ առանց իրողությունները նախապես ճշտելու անհիմն մեղադրանքներ եւ վիրավորական ակնարկներ չանել հարգարժան ու ամբողջապես իր հայրենիքին նվիրված քաղաքական գործչի եւ մի ամբողջ կուսակցության հասցեին»: