Լուրեր թիվ 1 ընտրատարածքից

Վերջին լուրեր 25 Նոյեմբեր, 2012 1:42

Թիվ 1 ընտրատարածքում առաջադրված պատգամավորի թեկնածու Ստյոպա Սաֆարյանը facebook-ի իր էջում գրել է.

«1. Արդեն կարելի է ասել, նախընտրական քարոզարշավով ծածկել ենք թիվ 1 ընտրտարածքի 90 տոկոսը: Այսօր հերթը Ավան Առինջ թաղամասի 1-ին ու 2-րդ մկրոշրջաններինն էր: Շնորհակալ եմ շուրջ 100 երիտասարդներին, սերնդակիցներիս ու ավագ սերնդի ընկերներիս, ովքեր այսօր ժամը 12:00-ից մինչեւ 18:00-ը բավականին ցուրտ եղանակային պայմաններում իրենց եռանդով, ակտիվությամբ նախընտրական մթնոլորտ էին ստեղծել ողջ թաղամասում: Շնորհակալ եմ հազարավոր ընտրողների առջեւ ինձ լավագույնս ներկայացրած իմ ընկերներին՝ Արմեն Մարտիոսյանին, Զարուհի Փոստանջյանին, Հովսեփ Խուրշուդյանին, Ստեփան Հասան-Ջալալյանին, Ռուբեն Հակոբյանին, ինչպես նաեւ՜ այդ ընթացքում իմ խոսքը բուկլետներով ընտրողներին հասցրած մյուս ընկերներիս:

2. Այսօր մենք բոլորս եւս մեկ անգամ ականատես եղանք Ավան վարչական շրջանի պերճանքին ու թշվառությունը: Կողքից Ավանը կարող է թվալ համեմատաբար բարեկարգ, խաղահրապարակներով ու կանաչ տարածքներով համայնք: Բայց, վստահեցնում եմ, Երեւանի ոչ մի համայնք չունի այն սարսափելի մթնոլորտը, ինչ Ավանը, որն այդ տարածքի հրաշալի բնակիչների ու մարդկանց համար ստեղծել են տեղական բդեշխները: Հենց ամենասկզբից ընտանեկան այգում կողքներս տնկվել էր տեղի համատիրության ղեկավարը, որպեսզի բնակիչները չմոտենան մեզ: Բայց երբ հարակից շենքերից մարդիկ սկսեցին իջնել իմ հետ հանդիպման, հասկացավ, որ իր ներկայությունը պոլի փայտի նշանակություն էլ չունի: Ավելին, մարդիկ փոխանցեցին, որ հարակից շենքերի «բնակիչները ողջունում են ինձ», մի մասը «չի կարող օբյեկտիվ պատճառներով գալ», մյուս մասը՝ «աշխատող է եւ չի ցանկանում շեստյորկաների կողմից նկարվել եւ իր անելիքը գիտի»: Համատիրության մի ղեկավար էլ հանդիպեց մեկ այլ հատվածում, ում շենքում բնակիչները գրեթե համատարած բացել էին պատուհանները կամ դուրս եկել պատշգամբներ' մեզ լսելու, իսկ վերջում էլ ձեռքերով ու օդային համբյուրներով հաջողություն էին մաղթում: Զայրացած, որ ինքը բացարձակ վլաստ /իր միջավայրի բառապաշարով եմ գրում/ չունի մարդկանց վրա, որպեսզի վերջիններս ուշադրությամբ չհետեւեն մեր խոսքին, տիկինը բակից մեր հեռանալուն զուգընթաց սաստիկ կարեւոր հայտարարություն արեց. «մենք մեր ձայնը արդեն տվել ենք Ռոբերտ Սարգսյանին»: Դե այդտեղի համար են ասել՝ մե ծիծաղ, մե ուրախություն, մե խինդ: Համակիրներս ուղղակի քանդվել էին: Նրանցից մեկը նույնիսկ տիկնոջը հորդորեց գոնե սպասել մինչեւ դեկտեմբերի 2-ը… ՉԻ կարելի սեփական ժողովրդի համար այսպիսի մթնոլորտ ստեղծել: Դրա ստեղծողը չի կարող լավ տղա լինել կամ համարվել: Ոչ մի ծաղիկ ու ծաղկանոց, ոչ մի պուրակ չի կարող թաքցնել այս զազրելի մթնոլորտը, որին չես հանդիպի, օրինակ, Նոր Նորքում՝ որքան էլ այն ավելի քիչ բարեկարգ է: Եթե անկեղծ լինեմ, ապա այսօր հարյուրներով մարդիկ ստվերի նման ուղեկցեցին մեզ՝ նյարդայնացած, ատամներ կրճտացնելով, բայց անիմաստ ու աննպատակ: Հենց որ դա հասկացան, արդեն կեսից գնացին: Կեցցեն Ավան-Առինջի այն խիզախ քաղաքացիները, ովքեր չվախեցան, ցրտին էլ իջան բակ կամ պատուհանները լայն բացեցին կես ժամ մեզ լսելու համար: Ինչպես իրենց առջեւ եմ խոստացել' իմ ընտրվելու դեպքում թաղի տերերը միայն իրենք են լինելու, եւ ոչ մի պաշտոնյա կամ թաղային թափթփուկ:

3. Օրվա վերջում նախընտրական շտաբ բազմաթիվ զանգեր եղան Ավանից ու Ավան-Առինջից: Մարդիկ զայրացած են, քանի որ այսօր մի այլ կարգի «թափով» իրենց պարտադրում են տալ անձնագրերը կամ անձնագրային տվյալները; Արդեն այլ ճար չունեն, քան հոգեբանորեն ազդելը, թե՝ քանի որ տվել են անձնագիրը կամ դրա տվյալը, ապա այլ բան քվեարկել չեն կարող եւ իրենք իմանալու են այդ մասին; Այս մասին պատմում էին նաեւ հանդիպման եկած ավան-առինջեցիները: Սակայն, ակնհայտորեն, մեր ներկայությունից հետո այն սկսել են իրականացնել ավելի մեծ թափով: Բայց մենք մարդկանց արդեն ասել ենք' տեղամասերում ու դրանից դուրս այնքան շատ դիտող աչք ու հայացք է լինելու, որ ոչ մեկ չի կարողանալու խաղեր տալ կամ ընտրողին հետեւել; Այնպես որ էժանագին տրյուկի են դիմում, եւ ոչ ավելին:

4. Ափսոս այսօրվա տպավորիչ քարոզարշավից նկարներ չունեմ՝ ֆոտոխցիկը լիցքավորում չուներ: Չնայած, գիտեմ, որ երիտասարդներից ոմանք նկարում էին շատ բան՝ այդ թվում մեզ ուղեկցող ստվերներին: Այնպես որ՝ ֆեյսբուքում միգուցե լինեն տարբեր նկարներ, բայց այլոց կողմից տեղադրված»: