ԱՄՆ-ում սուպերմարկետի աշխատակիցները սպանել են ապրանք գողացող հաճախորդին

ԱՄՆ-ում Walmart սուպերմարկետի աշխատակիցները պատահաբար սպանել են մի հաճախորդի, ով փորձել է զեղչերի ակցիայի ժամանակ գողանալ մի քանի իր. փոխանցում է The Atlantic Wire-ը:

Միջադեպը տեղի է ունեցել նոյեմբերի 25-ին Ջորջիա նահանգում: Տղամարդը փորձել էր Walmart սուպերմարկետից գողանալ 2 DVD նվագարկիչ, սակայն նրան կանգնեցրել են սուպերմակետի 2 ծառայողներն ու անվտանգության աշխատակիցը: Բախման արդյունքում, ենթադրվում է, որ թիկնապահը չափից ավելի ուժեղ է սեղմել տղամարդու վիզը, որից և վերջինս խեղդվել է:

Երբ վրա են հասել ոստիկանները, տղամարդն արդեն անգիտակից վիճակում է եղել, նրան տեղափոխել են հիվանդանոց, ուր բժիշկները հաստատել են մահվան փաստը: Հայտնի չէ, թե տառապում էր արդյոք տղամարդը որևէ հիվանդությամբ, ինչը կարող էր հանգեցնել վաղաժամ մահվան, թե՝ ոչ:

Տարվում է հետաքննություն: Անվտանգության աշխատակիցը հեռացվել է աշխատանքից, իսկ երկու ծառայողները ժամանակավոր ազատվել են իրենց պարտականությունների կատարումից մինչ հետաքննության ավարտը:

Հիշեցնենք, որ անցյալ շաբաթ ԱՄՆ-ի սուպերմարկետների մեծ մասում զեղչերի ակցիաներ էին կազմակերպվել, որոնք մեկնարկել էին, այսպես կոչված, «Սև ուրբաթից»՝ Գոհաբանության օրվան հաջորդող օրվանից: Նման օրերին խանութներն այնքան ծանրաբեռնված են լինում այցելուներով, որ արդյունքում մեծ քանակով մարդիկ վնասվածքներ են ստանում:

Անցյալ տարի նույն այդ սուպերմարկետների ցանցի մեկ այլ աշխատակից մահացել էր` ընկնելով մարդկանց խիտ բազմության մեջ: