Վրաստանի կառավարությունից պահանջում են չերքեզների ցեղասպանության փոխարեն ճանաչել Հայոց ցեղասպանությունը

Վրաստանում Իրակլի 2-րդի անունը կրող միությունը կարծում է, որ Վրաստանի կառավարությունը պետք է չեղյալ հայտարարի երկրի նախկին խորհրդարանի կողմից ընդունած չերքեզների ցեղասպանության ճանաչման մասին որոշումը և ճանաչի Հայոց ցեղասպանությունը: Այդ մասին ИА REGNUM-ին հայտնել է այդ միության նախագահ Արչիլ Չկոիձեն:

Խոսելով չերքզների ցեղասպանության փաստն ընդունելու մասին՝ քաղաքական գործիչը նշել է, որ այդ փաստաթուղթն, ու առհասարակ մյուս որոշումները, ընդունվել են հանպատրաստից, մեկ մարդու քմահաճույքով: «Այն ամենը, ինչ կատարվում էր մեր երկրում, կատարվում էր հանպատրաստից և մեկ-երկու մարդու քմահաճույքով՝ առանց պատմությունն ուսումնասիրելու։ Այդ հարցերում նույնիսկ հատուկ մասնագիտական խմբեր չէին ստեղծվում»,-պարզաբանել է Չկոիձեն և նշել, որ չերքեզների ցեղասպանության ընդունումը Վրաստանի նախկին կառավարության կողմից մեկ նպատակ էր հետապնդում՝ անհանգստություն պատճառել Ռուսաստանի ղեկավարությանը:

Քաղաքական գործչի խոսքերով՝ Ռուսական կայսրության տարածքում իրականացված չերքեզների ցեղասպանությունը ճանաչված չէ աշխարհի ոչ մի քաղաքակիրթ երկրի կողմից, մինչդեռ Օսմանյան Թուրքիայում Հայոց ցեղասպանությունը ճանաչվել է Եվրամիության, ԱՄՆ-ի կոնգրեսի, Ֆրանսիայի, Գերմանիայի, Շվեյցարիայի կողմից: Ավելին, շատ երկրներ պատժամիջոցներ են կիրառում նրանց դեմ, ովքեր հրապարակայնորեն ժխտում են Հայոց ցեղասպանությունը:

«Վրաստանում ապրում է 300 հազար հայ, որոնց նախնիները ժամանակին զոհ են գնացել այդ ցեղասպանությանը»,-ասել է Արչիլ Չկոիձեն: