Ստյոպա Սաֆարյանի շուրջ չհամախմբվելով` ընդդիմությունը նվեր է մատուցում ՀՀԿ-ին

Քաղաքական փորձագետ Տիգրան Աբրահամյանը (Tigran Abrahamyan) Facebook սոցցանցի իր էջում գրել է.

«Դեռ պարզ չէ, թե Ստեփան Սաֆարյանի՝ թիվ 1 ընտրատարածքում առաջադրվելու քայլն ինչով կավարտվի, սակայն դա նվազագույնը ցույց է տալիս, որ «Ժառանգությունը» քաղաքական պայքարը շարունակում է, ինչը միանշանակ չի կարելի ասել այլ ուժերի մասին: Ընդ որում՝ Ս. Սաֆարյանի իրականացրած քարոզարշավը ցույց է տալիս, որ նա ամեն ինչ անում է նվազագույնը շատ ձայներ հավաքելու, իսկ առավելագույնը՝ հաղթանակ ապահովելու համար: Իսկ ի՞նչ են անում մնացած ուժերը (ՀՀԿ-ին չի վերաբերվում, թիվ 1-ում և 35-ում ՀՀԿ-ն առաջադրումներ արել է): Ինչո՞ւ քաղաքական ուժերը և մասնավոարպես ՀԱԿ-ը, ՀՅԴ-ն, ԲՀԿ-ն այդ ընտրատարածքներում թեկնածուներ չեն առաջադրում կամ գոնե չեն պաշտպանում ընդդիմության թեկնածուին:

Ստացվում է, որ «Ժառանգության» թեկնածուին չպաշտպանելով ու առհասարակ այդ ընտրություններին անտարբեր վերաբերվելով՝ նրանք օժանդակում են ՀՀԿ-ի թեկնածուներին, իսկ ավելի լավ նվեր ՀՀԿ-ն չէր էլ ակնկալում: Արդյո՞ք ընդդիմությունը հատվածական պայքարով կարող է լուրջ արդյունքի հասնել կամ հասարակությանը նման պահվածքով վստահություն ներշնչել, համենայն դեպս Սաֆարյանին աջակցությունը ցուցաբերելն ավելի շատ հաջողություն է խոստանում, քան քվորումի բացակայության պայմաններում ինչ-որ օրենքներում փոփոխությունների գնալը»: