«Գաղափարից դեպի շուկա» դրամաշնորհային մրցույթ

Նոյեմբերի 27-ին և 28-ին, ժամը 10:30-ին «Արմենիա Մարիոթ» հյուրանոցի «Տիգրան Մեծ» դահլիճում տեղի կունենա վենչուրային համաժողով, որի ընթացքում կներկայացվեն «Գաղափարից դեպի շուկա» դրամաշնորհային մրցույթի մասնակից թիմերի ծրագրերի շնորհանդեսները:

Նոյեմբերի 27-ին, միջոցառման բացմանը, ներկա կլինի ՀՀ էկոնոմիկայի նախարարի առաջին տեղակալ Կարինե Մինասյանը:

Համաժողովի ավարտին` նոյեմբերի 28-ին, ժամը 14.30-ին, կամփոփվեն և կհայտարարվեն դրամաշնորհային մրցույթի արդյունքները:

Վենչուրային համաժողովը կազմակերպվում է Գիտության և տեխնոլոգիաների ձեռներեցության ծրագրի (STEP) շրջանակում` ՀՀ էկոնոմիկայի նախարարության, «Ձեռնարկությունների ինկուբատոր» հիմնադրամի և ԱՄՆ Քաղաքացիական հետազոտությունների և զարգացման հիմնադրամի (CRDF) համատեղ ջանքերով:

Ծրագրի նպատակն է` աջակցել ճարտարագետներին, հետազոտողներին և գիտնականներին ներկայացնելու իրենց նորարարական ապրանքները շուկայում, ստեղծելու նոր վենչուրային ձեռնարկություններ և արդյունավետ համագործակցություն ծավալելու գործող ընկերությունների հետ: STEP ծրագիրը նպաստում է նաև տնտեսության զարգացմանը՝ օգնելով հայ գիտնականներին կապեր հաստատել տեղական և միջազգային ընկերությունների հետ, ինչը կարող է փոխշահավետ համագործակցության սկիզբ հանդիսանալ:

Համաժողովը հնարավորություն կընձեռի ծանոթանալու «Գաղափարից դեպի շուկա» դրամաշնորհային մրցույթի 1-ին փուլի արդյունքում տեղեկատվական և բարձր տեխնոլոգիաների, բիոտեխնոլոգիայի և ճարտարագիտական ոլորտների 50 ծրագրերից ընտրված 21 ներդրումային ծրագրերին:

Գիտության և տեխնոլոգիաների ձեռներեցության ծրագրի (STEP) ընթացքում հայ հետազոտողներն աշխատել են մասնավոր ձեռնարկությունների հետ` նպատակ ունենալով բացահայտելու և իրագործելու նոր գործարար հնարավորություններ: Համատեղ աշխատանքի արդյունքում մշակվել են մասնավոր ներդրողների համար գրավիչ և շահութաբեր գիտահետազոտական առաջարկներ: