Ի՞նչ պատահեց Սերժ Սարգսյանի ամենասիրելի օլիգարխի հետ

Մի ժամանակ Միխայիլ Բաղդասարովն այն մարդն էր, ով կարող էր ցանկացած ժամի առանց նախազգուշացման մտնել Բաղրամյան 26: Բաղդասարովը համարվում էր Սերժ Սարգսյանի բիզնես շահերի ներկայացուցիչը և նախագահի կողմից սեփական թիկնազորին հատուկ հանձնարական էր տրված՝ իր օլիգարխի առաջ նստավայրի դռները ցանկացած ժամի բացելու վերաբերյալ: Անգամ նախագահի քնած լինելու պարագայում հրամայված էր անհապաղ արթնացնել: Ըստ այդմ, Միկա Բաղդասարովը Հայաստանի եզակի «բեզպրաբլեմ» օլիգարխներից մեկն էր:

Երեք օր առաջ «Արմավիա»–ի սեփականատերը հայտարարել է, թե անպայմանորեն ազատվելու է ընկերությունից: «Արմավիա»-ն արդեն տևական ժամանակ բացի գլխացավից, կարծես թե, ուրիշ ոչինչ չի տալիս սեփականատիրոջը՝ հատկապես, որ ավիաընկերության՝ թռիչքներ իրականացնելու լիցենզիան էլ հաջորդ տարի սպառվում է: «Արմավիա»–ից, փաստորեն, հոգնել են բոլորը՝ թե՛ տերը, թե՛ ուղևորները, որ անընդհատ փաստի առաջ են կանգնում, թե՛ պետական մարմինները՝ հաշվի առնելով, որ ավիաընկերության ու օդանավակայանի հաշտեցման դերը, ի վերջո, ստանձնեց ՀՀ փոխվարչապետ Արմեն Գևորգյանը, ում միջնորդությամբ ձեռք բերված պայմանավորվածությունն էլ վերջին երեք շաբաթվա ընթացքում զերծ է պահում հանրությանը «Արմավիա»–ի թռիչքների դադարեցմանը վերաբերող հերթական տեղեկատվությունից: Եթե Բաղդասարովի «Արմավիա»-ական պրոբլեմներին գումարում ենք նաև «Միկա-ցեմենտ»–ի հետ կապված պատմությունները, ավելի քան հստակ ուրվագծվում է անկումը. Միկա Բաղդասարովը նախագահի երբեմնի ամենավստահելի օլիգարխից վերածվել է Արմեն Գևորգյանի «տղայական պայմանավորվածության» շնորհիվ «շունչ քաշող» բիզնեսմենի:

Բաղդասարովի «անկման» հայտնի պատճառը «ազգային ավիափոխադրողի» պարտքներն են: Ավիաընկերությունում ասում են, թե աշխարհում նման պրակտիկա չկա, որ օդանավակայանը պարտքերի պատճառով ավիաընկերությանը զրկի չվերթներ կատարելու հնարավորությունից: Հատկապես, որ չվերթների դադարի ժամանակահատվածում ավիաընկերությունը, ըստ էության, զրկվում է վաստակելուց, այսինքն՝ պարտքերը մարելու ռեսուրսը պակասում է: Ի դեպ, որոշ տեղեկություններով, այս ընթացքում նաև ավիատոմսերի վաճառքով զբաղվող ընկերություններն են որոշակի դեր կատարում՝ իրենց հաճախորդներին հորդորելով՝ խուսափել «Արմավիա»-ի տոմսերից:

Զարմանալի զուգադիպությամբ «Զվարթնոց»-ն այս տարի «Արմավիա»-ի պարտքերը հիշեց և որոշում կայացրեց սանկցիաներ կիրառել խորհրդարանական ընտրությունների շրջանում: Հաջորդ կաթվածը սեպտեմբերի 21-ի՝ անկախության օրվա նախօրեին էր: Վիճակը սրվեց այն բանից հետո, երբ շրջանառության մեջ դրվեց ընկերության վաճառքի մտադրությունը:

Հենց այս յուրահատուկ բռնկումներն էլ հիմք են տալիս ենթադրել, որ Էդուարդո Էռնեկյանի թույլտվությամբ կիրառվող սանկցիաներն այդքան էլ «անմեղ չեն» և կարծես թե կոնկրետ նպատակ են հետապնդում: Հատկապես, եթե հաշվի ենք առնում այն հանգամանքը, որ «Արմավիան», ըստ էության, «ազգային ավիափոխադրող» տիտղոսը կրում է զուտ ֆորմալ կերպով, քանի որ նրա հետ միաժամանակ բոլոր ուղղություններով նույն քանակությամբ թռիչքներ են իրականացնում նաև մյուս ավիաընկերությունները, մինչդեռ «Արմենիա միջազգային օդանավակայաններ» ՓԲԸ-ն իրականում հայաստանյան թռիչքների լիարժեք մոնոպոլիստն է՝ իր ձեռքում կենտրոնացնելով թե՛ «Զվարթնոց» և թե՛ «Գյումրի» օդանավակայանները: Այս պահի դրությամբ դժվար է ասել՝ «Արմավիա»–ի համար խնդիրներ ստեղծելու ճանապարհով օր առաջ ընկերության բարեհաջող վաճառքն ապահովելու հարցում Էռնեկյանի շահագրգռվածությունն անմիջակա՞ն է, թե՞ միջնորդավորված. Միկա Բաղդասարովը հայտարարել է արդեն, որ 2-3 շաբաթվա մեջ վաճառքի գործարքը կկայանա, սակայն դեռևս գործարքի մյուս կողմի անունը գաղտնի է պահվում: Նույն կերպ դժվար է ասել նաև, թե ի՞նչ կշահի ՀՀ քաղաքացին այս ընկերության վաճառքից և այն բանից, որ ընկերության սեփականատիրոջ աթոռին կբազմի մեկ ուրիշը: Միանշանակ է մի բան՝ «ազգային ավիափոխադրող» հորջորջվողը միայն վերջին շրջանում է հայտնվել «հալածյալի» կարգավիճակում և մինչ օրս աշխատում է միայն ու միայն գերշահույթի ակնկալիքով՝ հաշվի առնելով, որ հայաստանյան ավիատոմսերն անհամեմատելի են մյուս երկրների ավիատոմսերի հետ: Չի բացառվում, որ այս հարցում որոշակի դեր ունենա նաև «Արմենիա միջազգային օդանավակայաններ» ՓԲԸ-ն, որն, ի դեպ, ասում են, նոր տերմինալի շինարարության համար շատ ավելի մեծ թիվ է հրապարակել իբրև ծախս, քան եղել է իրականում: Իսկ նման՝ թեկուզ ուռճացված «ծախսերը», ինչպես գիտենք, փորձում են անպայմանորեն հետ բերել մինչև վերջին կոպեկը, ընդ որում, միայն իրենց հայտնի ձևերով...