Ոստիկանության նախկին բարձրաստիճան պաշտոնյան ձերբակալվեց և տեղափոխվեց «ԿՊԶ» (ՖՈՏՈ, ՏԵՍԱՆՅՈՒԹ)

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, այսօր՝ հունվարի 5-ին, ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Դավիթ Մարտիրոսյանի որոշմամբ ձերբակալվել է Երևանի Չարենցի փողոցի 1-ին նրբանցքի բնակիչ 48-ամյա Արմեն Հարությունյանը։

Նրա նկատմամբ քննիչ Դ. Մարտիրոսյանի կողմից հարուցվել էր քրեական գործ ՀՀ քրօր–ի 242 հոդվածի 2-րդ մասի (ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) և 244 հոդվածի (ճանապարհատրանսպորտային պատահարի վայրը թողնելը) հատկանիշներով։

Ինչպես ավելի վաղ դեպքի վայրից ԼՈՒՐԵՐ.com-ին հայտնել էր ֆոտոլրագրող Գագիկ Շամշյանը, հունվարի 3-ին՝ ժամը 21.30-ի սահմաններում, Ա. Հարությունյանը իրեն պատկանող «ԲՄՎ X5» մակնիշի 10 ՈԼ 100 համարանիշի ավտոմեքենայով վրաերթի էր ենթարկել հետիոտնին՝ Երևանի բնակիչ 39-ամյա Արամ Մարգարյանին և թողնելով անօգնական՝ դիմել փախուստի։ Ա. Մարգարյանը տեղում մահացել էր։

Նույն օրը՝ կեսգիշերին, ոստիկանության քրեական հետախուզության գլխավոր վարչության Երևան քաղաքի վարչության, ոստիկանության Կենտրոնականի բաժնի և Երևանի ճանապարհային ոստիկանության, ինչպես նաև ոստիկանության քննչական գլխավոր վարչության ՃՏՀ քննության բաժնի աշխատակիցների ձեռնարկած օպերատիվ աշխատանքների արդյունքում հանցագործությունը բացահայտվել էր։ Ա. Հարությունյանը նախկինում աշխատել է ոստիկանության կազմակերպված հանցավորության դեմ պայքարի գլխավոր (6-րդ) վարչությունում, իսկ նրա եղբայրը՝ Արամ Հարությունյանը՝ ՀՀ գլխավոր դատախազության համակարգում։ Ֆոտոլրագրողը հայտնել էր նաև, որ ոստիկանության Մարաշի բաժանմունքի մոտ հավաքվածները պատմել էին, որ իրականում վրաերթի հեղինակը եղել է ոչ թե Արմեն Հարությունյանը, այլ նրա որդին։ Սակայն դա պետք է պարզվի քննության ընթացքում։

Ա. Հարությունյանն այս պահին տեղափոխվեց ոստիկանության Երևան քաղաքի վարչության ձերբակալվածների պահման վայր։

Լուսանկարները և տեսանյութը՝ Գագիկ Շամշյանի։

{gallery}shamshyan/x5-040112{/gallery}

{gallery}shamshyan/1-vraert{/gallery}