«Այս երկիրն իմն է» (տեսանյութ)

Հայտնի ամերիկուհի ծաղրանկարիչ Նինա Փալեյի ստեղծած այս դեռևս առաջին և միակ անիմացիան դիտարկվում է որպես, ինչպես հեղինակն է նշում սեփական պաշտոնական էջում, իր հավանական «Seder-Masochism» գեղարվեստական կինոնկարի վերջին տեսարանը:

Հեղինակի կողմից այն ի սնզբանե տեղադրվել է Vimeo-ում, այնուհետև տարածում գտել YouTube-ում:

Այս կարճամետրաժ անիմացիան ներկայացնում է «այս երկրի, հողի» վրա իշխած կամ ապրած քաղաքակրթություններն ըստ հաջորդականության, որոնք իրար փոխարինում են՝ ամենախելացիներն ու ամենադաժանները, ամենախորամանկներն ու ամենաուժեղները. մեկը մյուսին է նվաճում, այսպես շարունակ մինչև մեր օրերը, երբ այս նույն երկրի համար անդադար պայքար են ծավալում իսրայելցիները և պաղեստինցիները:

Նրանց բոլորին միավորում է միայն այս տարածքը. բոլորն էլ՝ նախնադարյան մարդուց մինչև ներկայիս իսրայելցիներն ու պաղեստինցիները, պնդում են, որ այն իրենցն է:

Եվ վերջապես հասնում է ավարտը, որը խորհրդանշում է Մահվան հրեշտակի գալուստը, այն է միջուկային ռումբերը և աշխարհի վերջը: Ինչպես Աստվածաշունչն է մեջբերում հեղինակն այս պահին. «Այսպիսով, վերջինը կլինի առաջինը, և առաջինը կլինի վերջինը»: