Իտալա-արաբական կենտրոնը միանում է Հայոց ցեղասպանության ճանաչման պայքարին

«Հայոց ցեղասպանությունը մոռացանք բոլորս: Երիտթուրքերի կառավարությունն իրականացրեց էթնիկ հայերի ջարդը Անատոլիայում, պատմաբանների գնահատականով՝ Ցեղասպանությանը զոհ գնաց Օսմանյան կայսրության հայերի երկու երրորդը: Դաժան ջարդերին սպանվեցին անխտիր բոլորը՝ առանց սեռի ու տարիքի տարանջատման, երեխաներն իսլամացվեցին, կանայք ուղարկվեցին հարեմներ». այս մասին գրում է իտալական agenziastampaitalia-ն: «Արմենպրես»-ի փոխանցմամբ՝ հոդվածագիրը իտալա-արաբական «Ասադական» կենտրոնի գլխավոր քարտուղար, ռազմական լրագրող Թալալ Խրայիսն է, ով հայտարարում է, որ իր ղեկավարած կառույցն անցնում է Հայոց ցեղասպանության ճանաչման գործին: «Մեր կենտրոնը Թուրքիային վերջնագիր չի ներկայացնում, այն պարզապես հայտարարում է, որ իր պարտքն է համարում այսուհետ հայ ժողովրդի հետ բարեկամական համագործակցությամբ պայքարել 1915թ. դեպքերի վրա լույս սփռելու համար»,-գրում է նա:

Հոդվածագիրը նշում է, որ Հայոց ցեղասպանությանը նախորդել են Սուլթան Համիդի կողմից իրականացված հայերի ջարդն ու արտաքսումը: Այնուհետ երիտթուրքերի կառավարության կողմից 1909-ին սկսվել են հայերի նոր ջարդեր, որոնք իրենց «տրամաբանական» գագաթնակետին են հասել 1915-ին: Ռազմական լրագրողի խոսքով՝ ներկայում Թուրքիան նույնպես ջարդեր է իրականացնում՝ կրկին սպանելով հայերին, քիրիստոնյաներին և ազգային փոքրամասնություններին՝ այս անգամ աջակցելով Սիրիայի գրոհայիններին: «Երեկ և այսօր և՛ հին, և՛ նոր օսմանյան կայսրությունները չեն ընդունում իրենց ոճրագործությունները: Թերևս միակ եվրոպական երկիրը, որը քաջություն ունեցավ հավատարիմ մնալու անմեղ զոհերի հիշատակին, Ֆրանսիան էր, որը հայտարարեց, որ նման կեցվածք որդեգրած Թուրքիան Եվրամիության համար չէ: «Եվրամիությունը Թուրքիայի համար չէ: Իմ դիրքորոշումն այս հարցի առնչությամբ մնում է անփոփոխ»,-ասաց Ֆրանսիայի նախկին նախագահ Նիկոլա Սարկոզին Երևանում ՀՀ Նախագահ Սերժ Սարգսյանի հետ ունեցած համատեղ ասուլիսում:

Հոդվածի վերջում Թալալ Խրայիսն ընդգծում է, որ ի հեճուկս հայ ազգին պատուհասած տառապանքների՝ հայերը շարունակում են իրենց հարևանների հետ խաղաղության և համագործակցության քաղաքականություն վարել: Նա մասնավորապես նշում է հայ-իրանական համակողմանի հարաբերությունների մասին, ավելի հեռու հարևաններից հիշատակում է հայ-ռումինական, հայ-իտալական հարաբերությունները: «Այս ազգը շատ տանջանքեր է տեսել, բայց հաղթահարել է այդ ամենը. այն ուժեղ եւ բարգավաճող երկիր է»,-եզրափակում է հոդվածագիրը:

Իտալա-արաբական կենտրոնը հիմնվել է 1995-ին Իտալիայի և արաբական երկրների միջեւ հարաբերությունների զարգացման նպատակով: Կենտրոնը մասնաճյուղեր ունի Իտալիայի բազմաթիվ քաղաքներում: Կենտրոնին անդամակցում են լրագրողներ, ակադեմիկոսներ, գիտնականներ, Իտալիայի խորհրդարանի պատգամավորներ, Իտալիայի քաղաքական բոլոր կուսակցությունների ներկայացուցիչներ և այլք: