Վրաստանում վերսկսվել է նախկին վարչապետ Զուրաբ Ժվանիայի մահվան հետաքննությունը

Վրաստանի գլխավոր դատախազությունը վերսկսել է նախկին վարչապետ Զուրաբ Ժվանիայի 2005 թվականի մահվան հանգամանքների հետաքննությունը։ Այս մասին լրագրողների հետ զրույցում հայտնել է վերջինիս եղբայր Գեորգի Ժվանիան. փոխանցում է РИА Новости-ն։

«Վրաստանի դատախազությունը վերսկսել է այս գործի հետաքննությունը։ Միակ բանը, որ կարող եմ ասել՝ կհարցաքննվեն մի շարք պաշտոնյաներ։ Ես բազմիցս ասել եմ, որ մահվան բեմականացումը Միխայիլ Սաակաշվիլիի գլխավորությամբ իրականացրել են Գեորգի Բարամիձեն, Վանո Մերաբիշվիլին և Զուրաբ Ադեիշվիլին (Սաակաշվլիի թիմի մեջ մտնող նախարարներ), իսկ պաշտոնական վարկածը, որի համաձայն՝ Ժվանիան մահացել է ավտովթարի հետևանքով, բացարձակ սուտ է »,-հայտարարել է Գեորգի Ժվանիան։

Ավելի վաղ նա պնդում էր, որ ապացույցներն առ այն, որ Ժվանիան թունավորվել է ածխաթթու գազի արտահոսքի պատճառով, համոզիչ չեն։

Նշենք, որ Զուրաբ Ժվանիան վրացական ժամանակակից քաղաքականության առանցքային դեմքերից մեկն է՝ «Վարդերի հեղափոխության» առաջնորդներից մեկը, որի հետևանքով Վրաստանի նախագահ դարձավ Միխայիլ Սաակաշվիլին։

Հիշեցնենք, որ Ժվանիայի և Քվեմո Քարթլի շրջանի (Արևելյան Վրաստան) փոխմարզպետ Ռաուլ Յուսուպովի մարմինները հայտնաբերվել էին 2005 թվականի փետրվարի 3-ին Թբիլիսիի վարձակալած բնակարանում։ Ըստ հետաքննութան պաշտոնական վարկածի՝ ողբերգական մահվան պատճառ էր դարձել դժբախտ պատահարը՝ թունավորումն ածխաթթու գազից։

Ժվանիայի ընտանիքն այս ամբողջ ընթացքում պահանջում էր մահվան հանգամանքների անկախ հետաքննություն՝ չվստահելով պաշտոնական վարկածին։ Հոկտեմեբրի 1-ին խորհրդարանական ընտրություններին հաղթանակած «Վրացական երազանք» կուսակցության առաջնորդ Բիձինա Իվանիշվիլին բազմիցս հայտարարել էր, որ կվերսկսի Ժվանիայի մահվան հանգամանքների հետաքննությունը։