Եգիպտոսում կանանց թլպատման դեպքերն ահագնացող տեմպերով աճում են

Եգիպտոսում, չնայած օրենսդրական արգելքին, կանանց թլպատումների թիվն ահագնորեն աճում է. գրում է Deutsche-welle-ն: Իշխանության գլուխ եկած իսլամիստները ցանկանում են կանանց թլպատումները կրկին օրինականացնել:

Ում Մուհամմեդն ապրում է Կահիրեի այն հատվածում, որտեղ մարդիկ սովորաբար աղբ են թափում: Ողջ կյանքը կեղտի և աղքատության մեջ անցկացրած կինը, սակայն, արդեն վարժվել է դրան: Միայն մի հիշողություն է նա իր կյանքից այդքան ծանր վերապրում. 35 տարի առաջ, երբ նա 12-ամյա աղջնակ էր, ծնողները տարել էին նրան իրենց թաղամասում գտնվող վարսավիրի մոտ, որը սովորական ածելիով թլպատել էր աղջկան և նրա հետ եկած մի քանի բախտակից դեռահասների: Դեռահաս աղջիկը մի քանի օր արնահոսել էր, որից հետո նրա հայրը շիկացած ածուխի միջոցով փորձել էր դադարեցնել արնահոսությունը: Նույն թաղամասից մեկ այլ աղջիկ մահացել էր նմանատիպ գործողության արդյունքում:

Եգիպտոսում մահացության դեպքերի հաճախակիանալուց հետո՝ 2008-ին, կանացի թլպատումներն օրենքով արգելվեցին: Բժիշկներին և բուժակներին, ովքեր ավանդաբար զբաղվում էին դրանով, նոր օրենքն ազատազրկմամբ էր սպառնում:

Սակայն հեղափոխության հաղթանակից հետո, երբ «Մուսուլման եղբայրներ»-ը եկան իշխանության, աղջիկների թլպատման քանակը սկսեց նորից աճել: Մուբարաքի օրոք մարդիկ վախենում էին միայն գործող օրենքի սպառնալիքից: Այժմ, սակայն, բժիշկներն ակնհայտորեն զբաղվում են կանանց թլպատումով, ավելին, կրկնակի թանկ գին են պահանջում, քան տղաների թլպատման համար:

Արմատականներն ու «Մուսուլման եղբայրներ» շարժման ներկայացուցիչները, ստանալով Մուհամմեդ Մուրսիի աջակցությունը, այժմ ձգտում են թլպատման օրինականացմանը:

Կահիրեում Կանանց ազգային խորհուրդը համագործակցում է գործող կառավարության և առողջապահության նախարարության հետ՝ բարձրաձայնելով կանանց նկատմամբ նմանօրինակ վերաբերունքի մասին: «Եթե թլպատումը պետք է պարտադիր բնույթ կրի, ապա դա պետք է արվի հիվանդանոցային պայմաններում և անվճար»,-կարծում է խորհուրդը: «Դա մանկապղծություն է և բարբարոսական ակտ: Քանի դեռ Եգիպտոսի նախագահն անձամբ հսկտակորեն թլպատման այս երևույթը հրապարակայնորեն չի դատապարտել, արմատականները շարունակելու են դա կիրառել գործնականում և մեզ դեպի միջնադար քաշել: Ես չգիտեմ, թե ինչու են նրանք այդքան ատում կանանց»,-ասում է խորհրդի անդամ կանանցից մեկը: