Ոստիկանության կադրային ջարդը Սարգսյանի նկարի պատճառո՞վ չէ

Երեկ հայտնի դարձավ, որ Երևանի Կենտրոն համայնքն արդեն նոր ոստիկանապետ ունի։ Հայաստանի ոստիկանապետ, ոստիկանության գեներալ-լեյտենանտ Վլադիմիր Գասպարյանի հրամանով՝ պաշտոնանկ է արվել ոստիկանության Կենտրոնականի բաժնի պետ, գնդապետ Սարգիս Մարտիրոսյանը։ 

Ոստիկանապետի մեկ այլ հրամանով՝ ոստիկանության Կենտրոնականի բաժնի պետ է նշանակվել Սերոբ Հարությունյանը, ով նախկինում զբաղեցնում էր ԿՀԴՊ ԳՎ (6-րդ) վարչության պետի առաջին տեղակալի պաշտոնը:

Այսօր արդեն մամուլում լուրեր տարածվեցին, որ ոստիկանության պաշտոնանկությունները կապված են նախօրեին մայրաքաղաքի կենտրոնում և ԲՈԻՀ-երին մոտ գտնվող պատերին ու գետնին հայտնված Սերժ Սարգսյանի՝ «Մի՛ ենթարկվիր» գրությամբ և վրան խաչ քաշած դիմանկարի մի քանի հարյուր օրինակի հետ:

Լուրեր.com-ը զրուցեց ՀՀ ոստիկանության հասարակայնության հետ կապերի վարչության աշխատակից Արմեն Մալխասյանի հետ՝ ճշտելու, թե արդյոք լուրերը համապատասխանում են իրականությանը, թե՝ ոչ։

Մալխասյանը նշեց, որ Ոստիկանության հասարակայնության հետ կապի և լրատվության վարչության պետ Աշոտ Ահարոնյանն արդեն իսկ հայտնել է կադրային փոփոխությունների պատճառը։ 

Նշենք, որ Ահարոնյանը լրատվամիջոցների հետ զրույցում ասել էր, որ պաշտոնանկությունները կոնկրետ պատճառ չունեն, և սովորական կադրային փոփոխություն է իրականացվել, ինչը մշտապես արվում է: