ՄԱԿ-ը նացիզմի հերոսացման դեմ բանաձև է ընդունել

Միացյալ ազգերի կազմակերպությունը (ՄԱԿ) Ռուսաստանի նախաձեռնությամբ ընդունել է բանաձև նացիզմի հերոսացման անթույլատրելիության մասին, որը կոչ է անում չմոռանալ սարսափելի հանցագործությունների մասին, որոնք իրականացվել են Երկրորդ համաշխարհային պատերազմի ժամանակ։ Ռուսաստանի կողմից 42 երկրի մասնակցությամբ կազմած փաստաթղթին «կողմ» է քվեարկել ՄԱԿ-ի 120 անդամ երկիր։ Դեմ է քվեարկել 3 երկիր՝ ԱՄՆ-ն, Կանադան և Մարշալյան կղզիները, 57 երկիր ձեռնպահ է մնացել. փոխանցում է ИТАР-ТАСС-ը։

Փաստաթղթում լուրջ անհանգստություն է արտահայտվում ամբողջ աշխարհում, մասնավորապես՝ Եվրոպայում ռասիզմ և քսենոֆոբիա քարոզող ծայրահեղական շարժումների աճի կապակցությամբ, որոնք նաև զբաղվում են ֆաշիզմի և ռասայական գերակայության գաղափարախոսության տարածմամբ։

Բացի այդ, ՄԱԿ-ի բանաձևում տեղ են գտել նաև անհանգստությունը երկրորդ համաշխարհային պատերազմի տարիներին նացիզմի դեմ պայքարողների հիշատակին կանգնեցված հուշարձանների ոչնչացման շարունակական փորձերի, ինչպես նաև՝ այդ անձանց աճյունների անօրինական տեղափոխման կապակցությամբ։