Միջազգային փորձագետները սկսել են Յասիր Արաֆատի աճյունի արտաշիրիմման գործընթացը

Միջազգային փորձագետների խումբն այսօր սկսել է Ռամալլայում (Հորդանանի արևմտյան ափ) թաղված Յասիր Արաֆատի աճյունի արտաշիրիմման գործընթացը: Այս մասին հաղորդում է ИТАР-ТАСС-ը:

Գործընթացը կատարվում է խստագույն հսկողության պայմաններում: Դամբարանն ու հարակից շրջանները ոչ միայն շրջափակվել են անվտանգության աշխատակիցների ուժերի կողմից, այլև ժապավեններով քողարկված են օտար աչքերից: Փորձագետներին խստիվ արգելված է հանդիպել լրագրողների հետ: Նմուշներ վերցնելուց հետո Պաղեստինի ինքնավարության առաջին ղեկավարի մարմինը նորից հողին է հանձնվելու:

Հիշեցնենք, որ Արաֆատը վախճանվել էր 2004-ին Փարիզի հիվանդանոցներից մեկում կաթվածի հետևանքով: Մի քանի տարի անց ֆրանսիական դատախազությունը սկսել է հետաքննություն, որի նպատակն է պարզել, թե կարող էին արդյոք Արաֆատին թունավորել պոլոնիումով:
Փորձաքննությունը վարելու են մասնագետներ Ռուսաստանից, Ֆրանսիայից և Շվեյցարիայից:

Արտաշիրիմումը կատարվում է նրա այրու՝ Սոհայի պահանջով, ով նրա մահվան վերաբերյալ կասկածներ է հայտնել: