ԲՀԿ-ն կընդունի՞ իր մեղքը ևս մի քանի կարևոր հարցերի չընդունման դեպքում

«Տիգրան Ուրիխանյանի բացակայությունը վաղը կայանալիք ՀՀ ԱԺ պետաիրավական հանձնաժողովի նիստից թողնում եմ Ձեր մեկնաբանությանը»։ Այս մասին Լուրեր.com-ի հետ զրույցում ասաց ՀՀ ԱԺ «Ժառանգություն» խմբակցության քարտուղար Զարուհի Փոստանջյանը։

Վերջինս նշեց նաև, որ օրակարգում ներառված է նաև «Ժառանգություն» խմբակցության կողմից ներկայացված օրենսդրական մի նախաձեռնություն, որը վերաբերում է այն ՀՀ քաղաքացիներին, ովքեր գտնվում են արտասահմանում և համապետական ընտրությունների ժամանակ հնարավորություն չունեն մասնակցելու ընտրությանը։

Նշենք, որ վաղը կայանալիք նիստի օրակարգում ներառված է 2008 թվականի մարտի 1-ի դեպքերն ուսումնասիրող ժամանակավոր հանձնաժողով ստեղծելու հարցը:

Հիշեցնենք, որ նոյեմբերի 9-ին ՀՀ ԱԺ-ում պետաիրավական հարցերի մշտական հանձնաժողովի նիստի ժամանակ մերժվեց ԱԺ «Ժառանգություն» խմբակցության պատգամավոր Զարուհի Փոստանջյանի հեղինակած նախագիծը «Հարսնաքար»-ի գործով հանձնաժողով ստեղծելու մասին։

Կողմ էին քվեարկել ՀՅԴ պատգամավոր Արծվիկ Մինասյանը, ՀԱԿ պատգամավոր Գագիկ Ջհանգիրյանը, անկուսակցական պատգամավոր Էդմոն Մարուքյանը և «Ժառանգություն» կուսակցությունից Զարուհի Փոստանջյանը։

Քվեարկությանը ներկա չէր ԲՀԿ պատգամավոր Տիգրան Ուրիխանյանը, ում բացակայությանը Փոստանջյանն արձագանքեց այսպես. «Ուրիխանյանը թռա՞վ»։

Հ.Գ.

Ինչպես «Հարսնաքար»-ի գործով, այնպես էլ 2008-ի մարտի 1-ի դեպքերն ուսումնասիրող ժամանակավոր հանձնաժողով ստեղծելու հարցերի կարևորության մասին է խոսում ցանկացած ոք, սակայն ստեղծված ավանդույթի համաձայն՝ ընդդիմության կողմից կարևորագույն հարցեր անլուծելի են մնում։ Նախորդ նիստի ժամանակ չստեղծվեց «Հարսնաքարի» դեպքերն ուսումնասիրող հանձնաժողով, այս անգամ ևս. շատ փոքր հավանակություն կա, որ կձևավորվի մարտի 1-ի դեպքերն ուսումնասիրող ժամանակավոր հանձնաժողով։ Ըստ էության, երկու պարագայում էլ «մեղավորը» ԲՀԿ-ն է։

Հանձնաժողովում ԲՀԿ ներկայացուցիչ Տիգրան Ուրիխանյանն այս անգամ ներկա է գտնվելու Բրյուսելում կայանալիք Հայաստան-Եվրամիություն միջխորհրդարանական համագործակցության հանձնաժողովի նիստին, որի ժամանակ բարձրացվելու ԼՂՀ հակամարտության կարգավորման և Ստեփանակերտի օդանավակայանի վերաբացմանն ուղղված աշխատանքներ կատարելու վերաբերյալ հարցեր: ԼՂՀ հարցը թերևս այս պարագայում մեղմացնում է Ուրիխանյանի բացակայությունը հանձնաժողովի կայանալիք նիստից։

Նախորդի ժամանակ Ուրիխանյանը ներկա էր, սակայն արդեն «Հարսանաքարի» հարցի քննարկման ժամանակ պատգամավորը դուրս է եկել դահլիճից և գնացել հեռուստատեսություն՝ մասնակցելու ուղիղ եթերում կայանալիք բանավեճին։

ԲՀԿ-ն միշտ ներկայացնում է, թե կարևորում է «Հարսնաքարի» գործը...ուստի այս պարագայում հարց է առաջանում՝ որևէ կերպ հնարավոր չէ՞ր հետաձգել ՀՀ-ում Տիգրան Ուրիխանյանի մասնակցությունը հեռուստաբանավեճին։