Պաղեստինյան պետության ստեղծման հարցն արդեն հասունացել է. Բան Կի Մունի հարցազրույցը Der Standard-ին

ՄԱԿ-ի գլխավոր քարտուղար Բան Կի Մունը Վիեննայում հարցազրույց է տվել ավստրիական Der Standard պարբերականին, որում անդրադարձել է վերջերս բռնկված իսրայելա-պաղեստինական նոր հակամարտությանը և դրա թողած հետևանքներին: Նա մասնավորապես նշել է. «Իսրայելի և արմատական իսլամիստական ՀԱՄԱՍ շարժման միջև Գազայի հատվածի համար վերջին հակամարտությունը պետք է դառնա Մերձավոր Արևելքում խաղաղության գործընթացի հաստատման նոր մեկնարկ: Շատ կարևոր է նշել, որ Ստատուս քվոյի հարցը չի կարող այլընտրանք ունենալ: Կարծում եմ, որ քաղաքական լուծման հնարավորությունները պետք է ավելի մեծանան հակամարտության կարգավորման հարցում: Ինձ համար մեծ թեթևացում էր, որ կողմերը կարողացան զինադադարի շուրջ համաձայնության գալ: Սակայն զինադադարը շատ փխրուն կարող է լինել, եթե կողմերը քաղաքական փոխհամաձայնության չկարողանան գալ: Զինադադարը չպետք է մնա կողմերի վերջնական նպատակը»,-ասել է Բան Կի Մունը:

Պետք է դադարեցվի ՀԱՄԱՍ-ին տարբեր տեսակի զենքի մատակարարումը և պետք է վերջապես հանվի Գազայի հատվածի շրջափակումը: ՄԱԿ-ն այստեղ խոշորագույն գործատուն է, և երթևեկության ու ազատ տեղափոխության ապահովումը Գազայի հատվածում առաջին հերթին մեզ համար է շատ կարևոր:

Հայացք գցելով այն հանգամանքին, որ Պաղեստինի նախագահ Մահմուդ Աբասը հինգշաբթի օրը պլանավորել է հայտ ներկայացնել ՄԱԿ-ին, որպեսզի վերջինս ճանաչի Պաղեստինը որպես ոչ անդամ պետություն, նա ասել է. «Պաղեստինյան պետության հարցն արդեն հասունացել է: Սակայն այն պետք է բանակցությունների միջոցով կայանա»: Լրագրողի այն հարցին, թե ՄԱԿ-ի Գլխավոր ասամբլեայի կողմից Պաղեստինին ոչ անդամ պետության կարգավիճակով դիտորդական առաքելություն շնորհելն արդյոք անուղղակիորեն չի նշանակում այդ պետության ճանաչում, Բան Կի Մունը նշել է. «Դա պաղեստինյան իշխանությունների որոշելու հարցն է: Ես՝ որպես գլխավոր քարտուղար, կարող եմ միայն մի բան անել՝ որևէ կերպ չազդել անդամ պետությունների կայացրած որոշման վրա: Ես անձամբ կարծում եմ, որ պաղեստինյան պետության հարցն արդեն հասունացել է»,-մեջբերում է պարբերականը: