Հայոց ցեղասպանության հարցում մենք փորձում ենք զսպել մեր էմոցիաները. Տիգրան Սարգսյան

Հայաստանի Հանրապետության վարչապետ Տիգրան Սարգսյանը Известия թերթին տված հարցազրույցում, անդրադառնալով Թուրքիայի հետ դիվանագիտական հարաբերություններին, մասնավորապես նշել է. «Մենք փորձում ենք վերահսկել 1915 թվականի Հայոց ցեղասպանության հետ կապված մեր էմոցիաները։ Այդ պատճառով մեր նախագահի նախաձեռնությամբ մենք Թուրքիայի հետ բանակցություններ ենք սկսել՝ առանց նախապայմանների դիվանագիտական հարաբերություններ հաստատելու համար։ Մեր այս նախաձեռնությանն աջակցել են ԵՄ-ն, ԱՄՆ-ն, Շվեյցարիայում ստորագրվել են արձանագրություններ։ Մեզ վրա մեծ ճնշում էր գործադրվում։ Հայկական սփյուռքը դեմ էր բանակցություններին և թուրքերի հետ արձանագրությունների ստորագրմանը։ Սակայն մեր՝ որպես հուսալի գործընկերոջ քաղաքական վարկանիշը կտրուկ բարձրացավ»։

Տիգրան Սարգսյանը նաև նշել է, որ այժմ գնդակը Թուրքիայի կողմում է. «Այնտեղ կա մի ալիք, որ ուզում է կառուցել քաղաքացիական հասարակություն և ճանաչում է Հայոց ցեղասպանությունը։ Եթե ինձ 20 տարի առաջ դա ասեին, ես չէի հավատա։ Ցեղասպանությունը դիպել է յուրաքանչյուր հայ ընտանիքի։ Իմ պապերը վերապրել են այդ սարսափը 1915 թվականին և հազիվ են փրկվել։ Մեր ամբողջ կյանքը կապված է այդ հիշողությունների հետ։ Պապս, որ զբաղվում էր մեր դաստիարակությամբ, այդ իրադարձությունների ժամանակ կորցրել է ամբողջ ընտանիքը, նա ընտանիքի կրտսեր որդին էր։ Այնպես որ, Ցեղասպանության ճանաչման հարցերը, Ղարաբաղյան հակամարտության կարգավորման հետ կապված հարցերը նույն շղթայի հանգույցներ են։ Ցավոք սրտի, այդ ծանր խնդիրները թույլ չեն տալիս մեզ կանգնել։

Միջազգային հանրությունը պետք է ճանաչի ցեղասպանությունը, իսկ մեղավորները պիտի գան մեղանչելու»։