Գերմանուհի մայրերը կվարձատրվեն տնային տնտեսությամբ զբաղվելու դիմաց

2013 թվականին Գերմանիայում կհայտնվի նոր սոցիալական նպաստ, որը նախատեսված է ծնողների համար տնային աշխատանքների դիմաց։ Նոր նպաստի մասին որոշումն ընդունվել էր Քրիստոնեա-սոցիալական միության ճնշման ներքո, որի համոզմամբ՝ երեխաների դաստիարակությունը պետք է վարձատրվի։ Ամենամսյա նպաստը 100 եվրոյի տեսքով կտրվի միայն այն գերմանացիներին, ովքեր երեխաներին մանկապարտեզներ չեն տանում՝ դայակի պարտականությունները վերցնելով իրենց վրա։

Գերմանիայում այս որոշումը բողոքի ալիք բարձրացրեց։ Հիմնական առարկություններից մեկն այն է, որ նպաստը կարող է խանգարել ներգաղթյալների ինտեգրացիային։ Ստացվում է, որ պետությունը խրախուսում է կանանց նստել տանը՝ երեխաների հետ, փոխարենը տանել նրանց մանկապարտեզ, որտեղ երեխաներն ավելի արագ կկարողանան գերմաներեն սովորել։

Բացի այդ, նշում է Deutsche Welle-ն, գերմանուհիները չափազանց վախենում են վերադառնալ ժամանակաշրջան, երբ հասարակությունը ստիպում էր նրանց զբաղվել միայն տնային տնտեսությամբ։