The Times-ը հրապարակել է լավագույն կրթական համակարգերի վարկանշային ցուցակը

Բրիտանական The Times պարբերականն այսօր հրապարակել է աշխարհի լավագույն կրթական համակարգերի վարկանշային ցուցակը, որի համաձայն՝ առաջին երեք տեղերում են Ֆինլանդիան, Հարավային Կորեան և Հոնգկոնգը։

Ուսումնասիրությունն իրականացվել է բրիտանական Eсonomist ամսագրի վերլուծական բաժնի պատվերով, վերլուծական և հոտազոտական խմբերը ղեկավարել է Մայքլ Բարբերը, որը ժամանակին Բրիտանիայի վարչապետ Թոնի Բլերի կաբինետում նախաձեռնել էր դպրոցական ռեֆորմը։

Մեծ Բրիտանիան վարկանշային ցուցակում զբաղեցրել է 6-րդ հորիզոնականը։ Ռուսաստանը 20-րդ հորիզոնականում է։ Ուսումնասիրությունը կազմակերպվել է ուսումնական հաստատությունների շրջանավարտների հանձնած միջազգային քննությունների արդյունքների, ուսանողների ընհանուր թվի և այլ տվյալների համեմատության վրա։

Առաջին 20-յակն ունի հետևյալ տեսքը՝ Ֆինլանդիա, Հարավային Կորեա, Հոնգկոնգ, Ճապոնիա, Սինգապուր, Մեծ Բրիտանիա, Նիդերլանդներ, Նոր Զելանդիա, Շվեյցարիա, Կանադա, Իռլանդիա, Դանիա, Ավստրալիա, Լեհաստան, Գերմանիա, Բելգիա, ԱՄՆ, Հունգարիա, Սլովակիա, Ռուսաստան։

«Մեր ցուցակում առաջատար դիրքեր են զբաղեցնում այն պետությունները, որոնք դասավանդողներին բարձր կարգավիճակ են տրամադրում։ Այդ երկրներում գոյություն ունի կրթության իսկական մշակույթ։ Դրա համար ցուցակում չներառված երկրների կառավարություններին անհրաժեշտ է ոչ թե պարբերաբար, այլ տևական ժամանակ ուշադրությունը սևեռել այս ոլորտի վրա»,-Մայքլ Բարբերի խոսքերը մեջբերում է ИТАР-ТАСС-ը։