Պապայի «ծիծակ» համարների անբարոյական էֆեկտները և որքան արժե «գոլդ» պետհամարանիշը

Երբ փորձում ես ընդվզել այսօրվա անմարդկային փառամոլության դեմ, հասկանում ես, որ իրականում այն արդեն գտնվում է վերջնական՝ մահաբեր փուլում, որտեղ էական չէ և ոչ մի ապաշխարություն, մնում է միայն վայելել ինքնակործանման բերկրանքը իր ողջ ներկապնակով…                                 Ու երբ Հայաստանում բոլորը բողոքում ու գանգատվում են անմարդկային վերաբերմունքից իշխանությունների կողմից ու ընդանրապես մարդկային փոխհարաբերությունների փոքրհոգությունից, հարց է առաջանում՝ քննադատելուց առաջ սեփական «Ես»-ին բավականաչափ ուշադրություն դարձվե՞լ է արդյոք, թե՞ ոչ: Եվ հենց այդ պարագայում է, որ լուծվում է այսքան բարդ թվացող, բայց իրականում հեշտադալար ու պարզամիտ խնդիրը:

Եվ ահա, երբ ականատես ես լինում, թե ինչպես են մարդիկ 5 նույն թվերի համար վճարում մի քանի միլիոն դրամ, հասկանում ես թշվառության աննկարագրելի, բայց միևնույն ժամանակ իրական սահմանները, որը գնալով վերածվում է ցինիզմի: Իսկ երբ վճարողի՝ դեռևս էմբրիոզի փուլում գտնվող «գլամուր» զավակը հորից պահանջում է, որ հինգ նույն թվերից բացի լինեն երկու նույն տառեր, դառնում ես անզոր այդ վերմարդկային ծաղրը զսպելու համար…

                                                                                                                                                                                                  Այո, խոսքը վերաբերում է ավտոմեքենաների պետհամարանիշերին և դրանց ընտրությանը: ՀՀ ոտիկանության կողմից տեղադրված նկարահանող սարքերից ու արագաչափերից բողոքող հայ բազմաչարչար ազգը տրտնջաց վերոնշյալ սարքերի գործունեության արդյունքում ամիսը մի քանի անգամ տուգանվելուց՝ այդ գործընթացն իրավմամբ անվանելով իսկական թալան սեփական ազգի նկատմամբ իշխանությունների կողմից: Բայց մեկ վայրկյան, եթե դա թալան է, ապա ինչպե՞ս կարելի է անվանել այն, որ հենց նույն այդ բողոքողներից իրեն «հարգող» ցանկացած վարորդ իր կյանքի նպատակներից մեկն է համարում այսպես ասած ԳՈԼԴ ՀԱՄԱՐՆԵՐ ուենալը և դրա համար սուտ կլինի, եթե ասենք ամեն ինչի, բայց տասնյակ հազարավոր դոլարներ վճարելու պատրաստ է: Ինչո՞վ է դա պայմանավորված, ի՞նչ առավելություն ունեն ԳՈԼԴ համարանիշերով երթևկող մեքենաները և դրանց վարորդները, եթե, իհարկե, հաշվի չառնենք նրանց՝ կատարելության ձգտող, վեհաշուք և քմահաճ ճաշակը:  

Առավելութուն №1. ԳԱԻ աշխատակիցների կողմից շատ հաճախ անտեսվում են ԳՈԼԴ պետհամարանիշեր ունեցող մեքենաների ճանապարհատրանսպորտային խախտումները և ոչ միայն:

Առավելություն №2. ԳՈԼԴ համարանիշերով երթևեկողներից շատ-շատերին այդպես էլ չեն հասնում տեսախցիկների ու արագաչափերի ֆիքսած խախտումների մասին տեղեկացնող ծանուցումները։

Առավելություն №3. ԳՈԼԴ համարանիշեր ունեցող մեքենաների առջև չկան փակ դռներ…

Առավելություն №4. Մերօրյա օլիգարխիկ վերնախավի ներկայացուցիչները ԳՈԼԴ համարանիշերի օգնությամբ ընդգծում են իրենց բարեկամական տոհմածառը։ Այսպես՝ Սամվել Ալեքսանյանի հանրահռչակ պետհամարանիշերը իրենց մեջ պարունակում են միայն վեցեր և զրոներ…

Առավելություն №5. ԳՈԼԴ համարանիշերի սեփականաշնորհում. այսինքն՝ դու վերցնում ես «գոլդ» համարանիշ և դրանով իսկ արգելք ես դնում նմանատիպ համարների տրամադրմանը այլ վարորդներին (իհարկե օրենքի սահմաններում), այդիպիսով սկսվում է ոստիկանների կողմից ճանաչման գործընթացը։

Այս վերոնշյալ առավելություններով հանդերձ հարց է առաջանում` արժե՞ արդյոք փող նվիրաբերել մեր երկրի մենաշնորհային բազմազանությամբ տառապող իշխանություններին, արդյոք դա էլ թալան չէ՞, որն ուղղակի կատարվում է դեմոկրատ ձևով և արդյոք տուգանքներից բողոքող քաղաքացիները բարոյական իրավունք ունե՞ն վճարել տասնյակ հազարավոր դրամներ թվերի և տառերի՝ պետհամարանիշերի դիմաց, մի՞թե սա իսկական տրամաբանական աբսուրդ չէ…Եվ եթե վճարում են այդ դրամները, այնուհետև նույն սկզբունքով արդյոք իրավունք ունե՞ն խոսելու թալանի մասին: Հարցեր, հարցեր և հարցեր, առաջանում են ամեն անգամ, երբ փորձում ես հասկանալ մարդկային իմաստնության՝ խելագարության հասցնող գաղափարները և վարքը: Վերջապես, որպեսզի պետհամարանիշային համակարգի այս անարխիան ավելի ըմբռնելի լինի, ներկայացնում եմ ձեզ պետհամարանիշերի արժեքներն՝ ըստ հայի ձևավորված ճաշակի էվոլյուցիոն փուլերի. ընտրովի պետհամարանիշերի գինը սկսվում է 36.000 դրամից, այնուհետև՝ 60.000 հազար դրամ, բայց այս պարագայում մեքենան վաճառելու դեպքում համարները վերադարձվում են համապատասխան մարմիններին, և այսպես շարունակ, մինչև 5 միլիոն դրամ։ Դե, գումարի չափն ակնհայտ է, որ խոսում է «ճաշակի և մշակութային բարձր արժեքների» մասին, այսինքն՝ այս դեպքում և՛ թվերն են կրկնվում, և՛ տառերը. ինչպես ասում է ռուսը՝ просто блеск, шик, отпад…

00oo000. ո՞ւմ են թողել այս վերերկրային գեղեցկությամբ փայլող կոմբինացիան, մի՞թե սա չէ, որ տարբերում է «մարդուն» մարդուց, «մեքենան»՝ մեքենայից, և եթե մի օր հանկարծ երևանյան փողոցներում հանդիպեք 00oo000 պետհամարանիշով ավտոմեքենայի, չզարմանաք, մենք գնում ենք այդ ճանապարհով, գնում ենք՝ մտքներումս ունենալով դրախտի տեսլականը… Իսկ քանի դեռ նման բան չի պատահել, հավատացեք, դեռ ամեն ինչ կործանված չէ…

Հ.Գ. Ինքնաբավարարման պրոցեսը մեր երկրում արդեն շուտվանից մեկնարկել է, բայց դրան զուգահեռ փոխվում են նաև ժամանակները և դա է, որ գոնե պետք է կանխարգելիչ ազդեցություն ունենա այդ պրոցեսի վրա: Լիահույս ենք, որ ժամանակի ընթացքում կվերանա ԳՈԼԴ համարանիշերի հերարխիան մեր երկրում՝ դռները բացելով իսկական գեղեցկության և նրբագեղության ճանաչման ու գնահատման առջև: Եվ վերջում՝ կոչ ԳՈԼԴԱՍԵՐ հասարակությանը. միշտ հիշեք՝ համա՞րն է, որ պիտի գեղեցկացնե ձեզ...

Գևորգ Ավետիսյան

Լուսանկարը՝ Գագիկ Շամշյանի