Կենսաթոշակային բարեփոխումներ 2012

Վերջին լուրեր 27 Նոյեմբեր, 2012 22:31

Նոյեմբերի 27-ին և 28-ին Երևանում կանցկացվի «Կենսաթոշակային բարեփոխումներ 2012թ.» տարեկան երկրորդ համաժողովը, որի շրջանակներում տեղի կունենա նաև «Կենսաթոշակային բարեփոխումներ. հեռանկարներ և իրականություն» թեմայով միջազգային երկրորդ գիտաժողովը, որին կմասնակցեն ավելի քան 130 մասնակից՝ ԱՊՀ, մերձբալթյան և այլ երկրների կենսաթոշակային հիմնադրամների ղեկավարներ, մասնագետներ, միջազգային կազմակերպությունների ներկայացուցիչներ, Հայաստանում կենսաթոշակային բարեփոխումներին առնչվող պետական կառավարման մարմինների ու գերատեսչությունների, առևտրային բանկերի, ֆինանսական այլ կառույցների, ասոցիացիաների, միջազգային և հասարակական կազմակերպությունների ղեկավարներ, փորձագետներ:

Հանդիպումը կազմակերպվել է ՀՀ աշխատանքի և սոցիալական հարցերի նախարարության, Սոցիալական ապահովության պետական ծառայության, «Կենսաթոշակային համակարգի իրազեկման կենտրոն» հիմնադրամի կողմից, որոնց աջակցել են ԱՄՆ միջազգային զարգացման գործակալությունն ու Կենսաթոշակային և սոցիալական հիմնադրամների միջազգային ասոցիացիան:

Համաժողովի նպատակն է. ուսումնասիրել կենսաթոշակային ոլորտում բարեփոխումներ նախաձեռնած երկրների փորձը, քննարկել տարբեր երկրներում բարեփոխումների ընթացքում ի հայտ եկած մարտահրավերները, ինչպես նաև ամփոփել Հայաստանում կենսաթոշակային բարեփոխումների առաջին երկու տարիների ընթացքում կատարված աշխատանքները, նախանշել առաջիկա անելիքները, վեր հանել բարեփոխմանն առնչվող խնդիրներն ու մարտահրավերները, քննարկել դրանց լուծման ուղիները:

Տարեկան համաժողովին առաջին անգամ կմասնակցեն նաև ակտիվների կառավարիչներ, որոնք հետաքրքրված են կամավոր և պարտադիր կուտակային կենսաթոշակային համակարգերի գործարկման արդյունքում ստեղծվող ներդրումային հնարավորություններով:

Երկօրյա հանդիպումների ընթացքում կքննարկվեն հետևյալ խնդիրները՝ բարեփոխումների քաղաքականության ապագա զարգացումներ, բազմաստիճան կենսաթոշակային համակարգի բաշխողական և կուտակային բաղադրիչներ, «Էլեկտոնային կենսաթոշակ» համակարգի ներդրման արդյունքներ, եկամտային հարկի և պարտադիր կուտակային վճարի անձնավորված հաշվառում, 2013 թվականի ընթացքում իրականացվելիք՝ կենսաթոշակային բարեփոխումների իրազեկման, հանրային ուսուցման և ֆինանսական գրագիտության ծրագրի հիմնական բաղադրիչներ, ֆինանսական կրթման հնգամյա ռազմավարություն: