Վարդան Ղուկասյանը գործ կունենա ոստիկանության հետ

Գյումրու նախկին քաղաքապետ Վարդան Ղուկասյանը շարունակում է իրեն քաղաքի տեր զգալ: Հենց այդ զգացողության պատճառով էլ, շատ հնարավոր է, որ շուտով Ղուկասյանը հերթական անգամ ոստիկանության հետ կապված խնդիրներ ունենա:

Իսկ պատճառը Գյումրիում սկսված հերթական ապօրինի շինարարությունն է: Նախկինում, ինչպես հայտնի է, Ղուկասյանի շինարարությունները «ապօրինի» պիտակից զերծ էին մնում: Քաղաքապետարանը թույլատրում էր շինարարություն իրականացնել, քաղաքապետն էլ իրականացնում էր: Հենց տարիներ շարունակ հաստատված «բարի ավանդույթներից» ելնելով էլ՝ Ղուկասյան Վարդանը հերթական շինարարությունն է սկսում և, ո՜վ զարմանք, նրան հայտնում են, թե «չի՛ կարելի»:

Խոսքը Գյումրու Տեքստիլ կոմբինատի տարածքում գազալցակայանի շինարարության մասին է: Տարածքը Ղուկասյանի սեփականությունն է, ճիշտ է, ձևակերպված ինչ-որ մեկի անունով: Այն գտնվում է բնակելի գոտում, Գյումրու ոստիկանության շենքի հետնամասում, մի խոսքով, այստեղ գազալցակայանի շինարարությունը խստիվ արգելվում է: Շինարարության թույլտվությունը տալիս է քաղաքապետարանը: Եվ ահա, Սամվել Բալասանյանի ղեկավարած քաղաքապետարանն արգելում է շինարարությունը, ավելին՝ տուգանում արգելքը զանց առնող և շինարարական աշխատանքներ իրականացնող քաղաքացիներին:

Ղուկասյանը սա ընդունում է իբրև անձնական վիրավորանք՝ հայտարարելով, թե ոչ ոք չի կարող իրեն արգելել: Շինարարությունը շարունակվում է, ընդ որում, գազալցակայանի համար օգտագործում են նաև հարևանությամբ գտնվող տեքստիլ ֆաբրիկայի պատերի քարերը: Քաղաքապետարանը երկրորդ անգամ է տուգանում ապօրինի շինարարություն իրականացնողներին. մեր տեղեկություններով՝ առաջին անգամ տուգանքի գումարը կազմել է մոտ 400 հազար դրամ։ Երկրորդ անգամ խոսքն արդեն 2-2,5 մլն դրամի մասին է: Սակայն երկրորդ տուգանքն էլ, դատելով տրամադրվածությունից, Ղուկասյանին չի կանգնեցնելու: Քաղաքապետարանն էլ իր հերթին կարծես թե որոշել է վերջ դնել Գյումրիում Վարդան Ղուկասյանի տիրապետության շրջանին և առաջնորդվել բացառապես օրենքով: Իսկ այդ դեպքում արդեն հաջորդ քայլը ոստիկանություն դիմելն է լինելու՝ ապօրինի շինարարություն իրականացնող և քաղաքապետարանի արգելքներին ենթարկվել չցանկացողին սանձելու նպատակով:

Սամվել Բալասանյանի պաշտոնավարումը սկսվեց անակնկալներով: Ղուկասյանն առանց կրակոցների հեռացավ քաղաքապետարանից, փոխարենը՝ հսկայական «ժառանգություն» թողեց՝ պարտքերի տեսքով: Դատելով Ղուկասյանի հայտարարություններից՝ պարտքերը, սակայն, դեռ միայն «ծաղիկներն» են: Գազալցակայանի հետ կապված այս պատմությունը ցույց է տալիս, որ նախկին քաղաքապետը շարունակում է Գյումրին համարել իր անձնական օգտագործման տարածքը, որտեղ ինքն իրավունք ունի անել այն ամենը, ինչ ցանկանա: Քաղաքապետարանի ցանկացած միջամտություն քաղաքի նախկին տիրոջ կողմից, ինչպես տեսնում ենք, ընկալվում է իբրև մարտահրավեր և պատասխան ստանում այնպես, ինչպես սովոր է պատասխանել քաղաքապետն իրեն վիրավորանք հասցնողներին: Հարցը՝ թե գազալցակայանի կառուցումը բնակելի հատվածում իսկապես անթույլատրելի է, չի էլ քննարկվում: Վարդան Ղուկասյան-Սամվել Բալասանյան հակամարտությունը շարունակվում է, այս պահի դրությամբ գազալցակայանի հետ կապված պատմությունը դեռևս տուգանքների հարթությունից այլ՝ քրեական բնույթի գործողությունների չի անցել: Սակայն որևէ երաշխիք, որ կոնֆլիկտն անցանկալի զարգացումներից կարող է զերծ մնալ, չկա:

Լուսինե Կեսոյան