Նաիրի Հունանյանի մայրն ինքնասպան է եղել որդիների «կանչով». Комсомольская правда

Նոյեմբերի 23-ի գիշերը Եվպատորիայի ափամերձ հատվածում հայտնաբերված խեղդված կնոջ դիակի մասին ոչ ոք չէր արձագանքի, եթե օպերատիվ աշխատանքների արդյունքում չպարզվեր, որ վերջինս հանրությանը հայտնի Նաիրի և Կարեն Հունանյան ոճրագործների մայրն է, ովքեր 13 տարի առաջ ՀՀ ԱԺ դահլիճում սպանել են ՀՀ վարչապետին և ԱԺ նախագահին: Այս մասին հայտնում է Комсомольская правда-Крым-ը։

Այդ չարաբաստիկ օրը՝ 1999-ի հոկտեմբերի 27-ին, եղբայրների և մյուս 5 հանցակիցների անունները հայտնի դարձան համայն աշխարհին. այդպես էլ պետք է լիներ։ Սրանք ուղիղ եթերում գնդակահարում են պետության գլխավոր դեմքերին և այլ քաղաքական գործիչների. նշում է կայքը:

Այդ աղմկահարույց գործի ընթացքում ահաբեկիչ եղբայրների մայրը՝ Նաթելլա Գալստյանը, մշտապես բնակվել է Եվպատորիայում կրտսեր որդու՝ Արմենի հետ: Ինչպես КП-ի թղթակցին պատմել են Ղրիմի հայ համայնքի ներկայացուցիչները, կինը երբեք էլ չի հալածվել որդիների գործած հանցանքի համար:

Հարևանների խոսքերով՝ մայիսին Նաթելլան որդու՝ Արմենի հետ միասին ուղևորվել է Հայաստան՝ մյուս որդիներին տեսակցելու: Ուղևորությունը շատ բարդ է եղել. կինը սկսել է օգտագործել հոգեմետ դեղեր: Բոլորովին վերջերս կնոջը սկսել են տանջել որդիների ձայները:

«Այդ երեկո Նաթելլան այցելեց ինձ և հարցրեց. «Երեխաներս քեզ մո՞տ են»,-КП-ին պատմել է հարևաններից Վլադիմիրը: «Նա ասում էր, որ իբր լսում է նրանց ձայները, որոնք գալիս են ծովից: Դրանից հետո, երբ նա հեռացավ ինձ մոտից, եկավ Արմենը. մորն էր փնտրում: Ավելի ուշ հաղորդեցին, որ ծովում նրա դին են հայտնաբերել»,-ասել է նա:

Վլադիմիրի խոսքերով՝ սկզբում եկեղեցին հրաժարվում էր անցկացնել Նաթելլա Գալստյանի հուղարկավորության արարողությունը, քանի որ եկեղեցին «չի ընդունում ինքնասպաններին», սակայն հարազատները կարողացել են համոզել քահանային։ Վերջինս համաձայնվել է, քանի որ դատաբժշկական եզրակացության համաձայն՝ մահվան պատճառը սրտի կաթվածն է եղել: 

Նշենք, որ Հունանյան եղբայրներն արդեն տեղյակ են ողբերգության մասին, սակայն օրենքն արգելում է ցմահ բանտարկված զանգվածային սպանություն գործած հանցագործներին լքել կալանքի վայրը: