Աղքատների թիվը և փոփոխության դինամիկան ՀՀ-ում

ՀՀ ազգային վիճակագրական ծառայությունը հրապարակել է ՀՀ-ում աղքատների թիվը և վերջին տարիներին դրանց փոփոխության դինամիկան:

Աղքատ են գնահատվել նրանք, ում սպառումը մեկ չափահաս անձի հաշվով ցածր է եղել աղքատության վերին ընդհանուր գծից, շատ աղքատ են գնահատվել նրանք, ում սպառումը մեկ չափահաս անձի հաշվով ցածր է եղել աղքատության ստորին ընդհանուր գծից, իսկ ծայրահեղ աղքատ գնահատվել են նրանք, ում սպառումը մեկ չափահաս անձի հաշվով ցածր է եղել աղքատության պարենային գծից:

2011թ.-ին աղքատության ընդհանուր` վերին և ստորին, ինչպես նաև ծայրահեղ աղքատության գծերը` արտահայտված մեկ չափահաս անձի հաշվով մեկ ամսվա համար գնահատվել են, համապատասխանաբար` 36,158 դրամ (կամ 97.1 ԱՄՆ դոլար), 29,856 դրամ (կամ 80.2 ԱՄՆ դոլար) և 21,306 դրամ (կամ 57.2 ԱՄՆ դոլար):

2008-2011թթ.-ին Հայաստանում աղքատության մակարդակի աճը պայմանավորող առավել կարևոր գործոնը 2009թ.-ի տնտեսության խոր անկումն էր` 14.1%: Հայաստանի տնտեսությունը 2010թ.-ին մի փոքր աճեց նախորդ տարվա նկատմամբ, սակայն աճը կազմեց միայն 2.2%, իսկ 2011թ.-ին 2010թ-ի նկատմամբ` 4.7%:

Տնտեսության խոր անկումը զուգորդվելով բնակչության եկամուտների ավելացող անհավասարության հետ, նպաստել է բնակչության սպառման նվազմանը: Ինչպես բացահայտում են 2011թ.-ի ՏՏԿԱՀ տվյալները, ողջ բնակչության միջին ամսական իրական սպառումը 2008թ.-ի համեմատ նվազել է 6.1%-ով: Նվազումը նկատվել է սպառման բոլոր քվինտիլներում:

Չնայած որ 2011թ.-ին 2010թ.-ի նկատմամբ աղքատության մակարդակը նվազել է, սակայն թե´ աղքատության մակարդակը, թե´ դրա խորությունն ու սրությունը, դեռևս գերազանցում են 2008թ.-ի ցուցանիշներին: Ի տարբերություն նախորդ երկու տարիներին փաստագրված աղքատության մակարդակի աճի, 2011թ.-ին արձանագրվեց աճի դադարեցում: 2011թ.-ին աղքատության մակարդակը կազմել է 35.0%, ինչը մի փոքր ցածր է նախորդ տարվա ցուցանիշից (35.8%):

2011թ.-ին բնակչության ավելի քան ամեն երրորդը` 35.0%-ը եղել է աղքատ, նրանցից ամեն հինգերորդը` 19.9%-ը` շատ աղքատ, իսկ նրանց թվում 3.7%-ը` ծայրահեղ աղքատ: Նախորդ երեք (2009-2011թթ.) տարիների ընթացքում մոտ 250,000 մարդ դարձել է աղքատ, աղքատների թվաքանակը 2011թ.-ին կազմել է մոտ 1.1 մլն. (մշտական բնակչության ցուցանիշի հաշվով), մոտ 240,000 նույն ժամանակահատվածում դարձել են շատ աղքատ, որոնց թվաքանակը կազմել է 650,000: Միայն երեք տարիների ընթացքում մոտ 70,000-ը դարձել է ծայրահեղ աղքատ, որոնց թվաքանակը 2011թ.-ին կազմել է մոտ 120,000:

Աղքատությունը 2011թ.-ին շատ չի տարբերվում ըստ քաղաքային (35.2%) և գյուղական բնակավայրերի (34.5%): 2008-2011թթ.-ին աղքատության մակարդակի աճը քաղաքային բնակավայրերում ավելի արագ է աճել, քան գյուղական բնակավայրերում (7.6 տոկոսային կետ` 7.0 տոկոսային կետի դիմաց): Մայրաքաղաք Երևանում աղքատության մակարդակն ամենացածրն է երկրում (27.5%) ըստ տարածաշրջանների և այն ավելի քիչ է տուժել գլոբալ տնտեսական ճգնաժամից, քան Երևանից դուրս, այլ քաղաքային բնակավայրերը: 2008թ.-ի համեմատ աղքատության աճը 2011 թ.-ին Երևանում կազմել է 7.4 տոկոսային կետ, Երևանից դուրս, այլ քաղաքային բնակավայրերում` 7.8 տոկոսային կետ: Ըստ քաղաք-գյուղ բաշխվածության, աղքատների մեծ մասը (64.8%) քաղաքաբնակներ են, նույն բաշխվածությամբ ծայրահեղ աղքատների մեծ մասը (80%) ևս քաղաքաբնակներ են: